काठमाडौं, मंसिर १६ । वैदेशिक रोजगार कार्यालय ताहाचलले वैदेशिक रोजगारीमा जाने श्रमिकलाई सहजै सेवा प्रदान गर्नका लागि आइतबारदेखि अनलाइन टोकन सेवा प्रारम्भ गरेको छ ।
श्रम स्वीकृति लिन कामदारलाई व्यवस्थित बनाउन टोकन प्रणालीको व्यवस्था गरिएको कार्यालयले बताएको छ । टोकनमार्फत नयाँ श्रम स्वीकृति, पुनः श्रम स्वीकृति र कागजात प्रमाणीकरणको काम गरिने वैदेशिक रोजगार कार्यालय ताहाचलका प्रमुख युवराज खतिवडाले जानकारी गराएका छन् ।
वैदेशिक रोजगार विभागको एकीकृत वैदेशिक रोजगार सूचना व्यवस्थापन प्रणाली (एफइआइएमएस) बाट प्राप्त निवेदनका आधारमा टोकन नम्बर सेवाग्राहीलाई उपलब्ध गराउने र टोकनमा उल्लेख गरिएको मिति र समयमा मात्र काम हुने विभागले बताएको छ ।
एकीकृत वैदेशिक रोजगार सूचना प्रणाली अन्तर्गत अब सेवाग्राहीले राहदानी विभाग, वैदेशिक रोजगार कार्यालय, वैदेशिक रोजगार विभाग, अध्यागमन विभागलगायतका सेवा पनि टोकनका आधारमा पाउने विभागले जनाएको छ ।
तोकेको मिति र समयमा सेवाग्राही सेवाका लागि आएमा घण्टौं लाइन बस्नुपर्ने बाध्यताको अन्त्य हुने कार्यलयको विश्वास छ । यस्तो सेवाका लागि सेवाग्राही आफैंले फारम भर्न सक्ने व्यवस्था गरिएको छ । विभागको साइटमा भएर फाराम भर्न मिल्छ ।
कार्यालयले एक दिनमा १ हजारसम्म सेवा दिनसक्ने जनाएको छ । सरकारले गएको असोज १५ देखि एकीकृत वैदेशिक रोजगार सूचना प्रणालीबाट सेवा दिने तयारी गरेको भए पनि ताहाचलबाट भने अझैसम्म यस्तो सेवाको थालनी हुन सकेको थिएन ।
श्रम स्वीकृतिका लागि अब सेवाग्राहीले दिनभर लामो लाइनमा बस्ने झन्झटको अन्त्य हुने कार्यालयले दावी गरेको छ । यो प्रक्रिया सञ्चालनमा आएपछि बिचौलिया र कर्मचारीको मिलेमतोमा हुने कामदार ठगीलगायत सबै समस्या सुल्झिने कार्यालयको भनाइ छ ।
यस्तै, सरकारले छिट्टै सातवटै प्रदेशबाट वैदेशिक रोजगारीसम्बन्धी सबै सेवा दिने तयारी पनि अगाडि बढाएको छ ।
