काठमाडौँ, साउन ६ । सिंगापुरमा भइरहेको उन्नाइस वर्षमुनिको विश्वकप क्रिकेट प्रतियोगिता अन्तर्गत भएको चौथो खेलमा नेपालले सिंगापुरलाई २२ रनले हराएको छ । टस जितेर ब्याटिङ गरेको नेपालले ४६ दशमलव ५ ओभरमा सबै विकेट गुमाउँदै १६८ रन बताउन सफल भयो । जवाफी ब्याटिङमा उत्रेको सिंगापुर ४६ दशमलव ५ ओभरमा सबै विकेट गुमाउँदै १४६ रनमा समेटियो ।
सिंगापुरका लागि रोहन रांगार्जनले २३, सिन अग्रवालले २१, सिद्धान्त सिंहले २५, युवराज सिंहले १९ र हन्सुल दीपले ३२ रन बनाए । सिंगापुरलाई १४६ रनमा रोक्ने क्रममा नेपालका कप्तान सन्दीप लामिछाने एक्लैले चार विकेट लिए भने किशोर महतो र पवन शर्राफले समान दुई दुई विकेट लिए र दीपेन्द्रसिंह ऐरीले एक विकेट लिए ।
त्यसअघि टस जितेर पहिले ब्याटिङ गरेको नेपालका लागि दीपेन्द्रसिंह ऐरीले अर्धशतक पूरा गरे । ८३ बल खेलेका उनले दुई छक्का र दुई चौका प्रहार गर्दै ५४ रन बनाए । प्रारम्भिक ब्याट्सम्यान सन्दिप सुनारले एक छक्का र दुई चौका हान्दै २६ तथा प्रकास केसीले २३ रन जोडे ।
