‘पत्रकारले सामाजिक सञ्जालमा राख्ने निजी विचारले पत्रकारले लेख्ने समाचारको विश्वासनीयतामा प्रभाव पार्ने’

महासंघका उपाध्यक्ष एवम् प्रमुख अतिथि विपुल पोखरेलले कार्यक्रममा बोल्दै पत्रकारले सामाजिक सञ्जालमा राख्ने निजी विचारले पत्रकारले लेख्ने समाचारको विश्वासनीयतामा प्रभाव पार्ने भन्दै पत्रकारका लागि सामाजिक सञ्जाल प्रयोग सम्बन्धी संहिता आवश्यक रहेको बताए ।

पत्रकार महासंघका सचिव तथा सामाजिक सञ्जाल सञ्चालन संहिता निर्माण कार्यदलका संयोजक प्रकाश थापाले पत्रकारहरुले सामाजिक सञ्जालमा कसरी प्रस्तुत हुने भन्ने विषयका लागि पनि संहिता आवश्यक देखिएकोले महासंघका सदस्यहरुलाई लक्षित गरेर सामाजिक सञ्जाल सञ्चालन संहिता बनाउन लागिएको जनाए ।

महासंघका सचिव रामप्रसाद दाहालले पत्रकारितालाई स्वच्छ र मर्यादित बनाउनका लागि सामाजिक सञ्जाल संहिता आवश्यक रहेको औंल्याए ।

नेपाल पत्रकार महासंघ डिजिटल मिडिया समितिका संयोजक एवम् केन्द्रिय सदस्य लेखनाथ न्यौपानेले नेपालको समग्र पत्रकारिता क्षेत्रलाई जिम्मेवार र मर्यादित बनाउन पत्रकारहरुका लागि सामाजिक सञ्जाल प्रयोग सम्बन्धी संहिता आवश्यक रहेको बताए ।

महासंघका केन्द्रिय सदस्य जन्मदेव जैशीले पत्रकारहरुका सामाजिक सञ्जाल संहिता निर्माण गर्नेक्रममा पत्रकारहरुले विचारलाई सामाजिक सञ्जालमा राख्न पाउने अधिकारको सम्मान गर्नुपर्ने बताए।

सेन्टर फर मिडिया रिसर्च सेन्टरका कार्यकारी निर्देशक उज्ज्वल आचार्यले पत्रकारिताको धर्म निर्वाह गर्न पत्रकारका लागि सामाजिक सञ्जाल प्रयोग सम्बन्धी संहिता आवश्यक रहेको धारणा व्यक्त गरे । उनले संहिता निर्माण गर्दा पत्रकारको व्यक्तिगत अभिव्यक्ति स्वतन्त्रतालाई ध्यान दिनुपर्ने धारणा राखे ।

अधिवक्ता एवम् इन्टरनेट गर्भनेन्स इन्स्चियुटका प्रमुख कार्यकारी अधिकृत बाबुराम अर्यालले समग्र पत्रकारिता जगतको नियमनका लागि समेत यो संहिता निर्माण गर्न आवश्यक रहेको बताए ।

अनलाईन पत्रकार संघका अध्यक्ष शिव सत्यालले पत्रकारले सामाजिक सञ्जालमा राख्ने अभिव्यक्तिसंग उसले लेख्ने समाचार तुलना गरिने हुदा पत्रकारहरुले सामाजिक सञ्जालमा आफ्ना गतिविधि राख्नु भन्दा अगाडि सोच्नु पर्ने धारणा  व्यक्त गरे ।

लेखा समितिका सदस्य मिराराज भण्डारीले पत्रकारहरुलाई बारम्बार विद्युतिय कारोबार ऐन अन्तर्गत पक्राउ गरिने परिपाटी बसेको भन्दै त्यसको अन्त्य हुनु पर्ने विचार  व्यक्त गरे ।

कार्यक्रममा पत्रकार महासंघ ललितपुर शाखाका अध्यक्ष ज्ञानप्रसाद पौडेल ,पत्रकार महासंघ काठमाडौ शाखाका उपाध्यक्ष सूर्य सुवेदी , सदस्य फणिन्द्र फुयाँल, अनलाइन पत्रकार संघका पूर्व अध्यक्ष प्रवेश सुवेदी, पत्रकार माधवप्रसाद घिमिरे लगायतले सामाजिक सञ्जाल र पत्रकारका विषयमा आआफ्नो धारणा  व्यक्त गरेका थिए ।