काठमाडौँ, मंसिर २८ । नेपालले आधा अर्ब अमेरिकी डलरको वार्षिक व्यापार गर्दै आएको एक प्रतिवेदनले देखाएको छ । दुई अर्ब अमेरिकी डलरभन्दा बढीको निर्यात व्यापार गर्ने क्षमता भएको नेपालले व्यापारिक क्षेत्रमा एकदमै कम अगानी गर्ने गरेको छ ।
विश्व बैंकद्वारा आज राजधानीमा सार्वजनिक गरिएको ‘आधा भरिएको ग्लास’ शीर्षकको प्रतिवेदनका सम्पादक सञ्जय कथुरियाले नेपालमा व्यापार–लगानीका अथाह सम्भावना भए पनि यहाँ व्यापार र लगानी निकै न्यून भएको बताए ।
प्रतिवेदन सार्वजनिक गर्दै अर्थमन्त्री युवराज खतिवडाले तुलनात्मक लाभका क्षेत्रमा लगानी वृद्धि गराएर आर्थिक समृद्धिको मार्गमा नेपालउन्मुख हुनसक्ने बताए ।
पर्यटनलगायत तुलनात्मक लाभका क्षेत्रमा लगानी गरेर बन्द व्यापार विस्तार हुनका साथै रोजगारीका अवसर पनि सृजना हुने उनको भनाइ छ ।
अहिलेको प्रतिस्पर्धात्मक बजारमा परम्परागत उत्पादनले नधान्ने यथार्थ प्रस्तुत गर्दै मन्त्री डा खतिवडाले कृषि क्षेत्रको प्रभावमा रहेको दक्षिण एशियाको अर्थतन्त्रलाई नवीनतम् उत्पादन र सेवाबाट सशक्त बनाउन सकिने विचार व्यक्त गरे ।
तीनदशक अघिदेखि देशको आर्थिक उन्नयनलाई राज्यले प्राथमिकतामा राखेको भन्दै उनले विकास र लगानीका अवरोधले लक्षित उपलब्धि हासिल हुन नसकेको वास्तविकता प्रस्तुत गरे । उनले भने– नीतिगत एवं संरचनागत सुधारबाटै गन्तव्यमा पुग्न सकिन्छ, हामी सुधारका पक्षमा छौँ ।
