काठमाडौँ, पुस १ । थाइल्याण्डको चाङमईमा भइरहेको १० औँ विश्व शारीरिक सुगठन तथा फिजिक स्पोर्ट्स च्याम्पियनशिपमा नेपालका महेश्वर महर्जनले स्वर्ण पदक जितेका छन् ।
उनले शनिबार साँझ विश्व शारीरिक सुगठनमा पुरुष ७५ केजी स्वर्ण जितेका हुन् । १२ खेलाडी सहभागी भएको सो प्रतिस्पर्धामा भारतीय खेलाडी दोस्रो र सिङ्गापुरका खेलाडी तेस्रो भएको नेपाल शारीरिक सुगठन तथा फिट्नेस सङघका उपाध्यक्ष दिनेश राजभण्डारीले बताए ।
पहिलो पटक नेपाली खेलाडीले विश्वस्तरमा स्वर्ण जितेको हो । गत वर्ष नेपालकी ननिता महर्जनले महिला एथ्लेटिक्स फिजिक्स १६० मा रजत पदक जितेकी थिइन् ।
अन्तर्राष्ट्रियस्तरमा महेश्वरले नेपाललाई स्वर्ण पदक दिलाएको यो दोस्रो पटक हो । महेश्वरले २०१६ मा भूटानमा भएको ५० औँ एशियन बडी बिल्डिङ एण्ड फिजिक स्पोर्टमा पनि ७५ केजी तौल समूहमा स्वर्ण जितेका थिए ।
यस्तै उनी नेपाली बडी बिल्डिङको सबैभन्दा प्रतिष्ठित र चर्चित धर्मश्रीको १३औँ संस्करणमा च्याम्पियन र १४औँ तथा १५औँ संस्करणमा दोस्रो बनेका थिए ।
