काठमाडौँ, पुस ३ । वैदेशिक रोजगारीका क्षेत्रमा देखिएका विकृति, विसङ्गति र अपारदर्शीता रहेको र अब यस्तो विसङ्गति धेरै दिनसम्म नरहने श्रम, रोजगार तथा सामाजिक सुरक्षामन्त्री गोकर्ण विष्टले बताएका छन् ।
वैदेशिक रोजगार प्रवद्र्धन बोर्डको सचिवालयले आज अन्तर्राष्ट्रिय आप्रवासन दिवस २०१८ का अवसरमा आयोजना गरेको ‘वैदेशिक रोजगारीः अबको बाटो’ विषयक अन्तक्र्रिया कार्यक्रममा बोल्दै उनले वैदेशिक रोजगारीमा रहेका लाखौँ युवाको जीवन ‘धराप’मा राख्ने अवस्थाको अब अन्त्य हुने बताए ।
वैदेशिक सिशिलामा रहेका नेपाली श्रमिक अब पसिना बगाउने र अपमानित बन्नुपर्ने अवस्थाको अन्त्य हुने उनको भनाइ छ । मन्त्री विष्टले आप्रवासी श्रमिकको मर्यादित र सम्मानित जीवनयापनको विषय अन्तर्राष्ट्रिय मुद्दा बनेको भन्दै आप्रवासी श्रमिकको हकतिका पक्षमा सबै राष्ट्रले सहकार्य गर्नुपर्नेमा जोड दिए ।
अन्तर्राष्ट्रिय, क्षेत्रीय तथा राष्ट्रिय मञ्चमा आप्रवासी कामदारको अधिकारको विषयले प्राथमिकता पाएको अवस्थामा क्षेत्रीय मञ्चका रुपमा रहेको कोलोम्बो प्रोसेस र अन्तरसरकारी मञ्चका रुपमा रहेको सुरक्षित, व्यवस्थित र नियमित आप्रवासनका लागि विश्वव्यापी सम्झौता (जिसिएम)ले पनि श्रमिकलाई न्याय दिने गरी आफ्नो भूमिका केन्द्रित गरेको उनले बताए ।
१५औँ पञ्चवर्षीय आवधिक योजनामा २५ वर्षीय दीर्घकालीन खाका ल्याउने तयारी गरेको जनाउँदै राष्ट्रिय योजना आयोगका सदस्य डा रामकुमार फुयाँलले वैदेशिक रोजगारीबाट फर्केका युवालाई स्वरोजगार बनाउने कार्यक्रम भित्र्याउने तयारी भइरहेको बताएका छन् ।
आप्रवासन विश्वव्यापी प्रवृत्तिका रुपमा विकास हुँदै गइरहेकाले यसलाई व्यवस्थित बनाउनुको विकल्प नभएको भन्दै श्रम मन्त्रालयका सचिव महेशप्रसाद दाहालले श्रम आप्रवासनका क्षेत्रमा देखा परेका समस्या सुल्झाउँदै व्यवस्थित बनाउन सरकारले कानून निर्माण र नीतिगत सुधारको पक्षमा कदम चाल्दै आएको जनाए ।
गन्तव्य मुलुकसँग भएको श्रम समझदारीलाई द्विपक्षीय श्रम सम्झौतामा परिणत गर्ने तयारी भइरहेको उनले बताएका छन् ।
नेपाल वैदेशिक रोजगार व्यवसायी संघका कार्यवाहक अध्यक्ष रामप्रसाद भन्तनाले वैदेशिक रोजगारीलाई व्यवस्थित र मर्यादिन बनाउनका लागि सरोकारवाला सबैको सामूहिक प्रयत्नको खाँचौ औँल्याउँदै वैदेशिक रोजगारी सुरक्षित र बनाउन सरकारसँग सहकार्य गर्न तयार रहेको बताए ।
व्यवसायी सुध्रन तयार छन् उनले भने, सामूहिक प्रतिबद्धता र एजेण्डा तयार गरौँ, विदेशबाट सीप र सभ्यता सिकेर फर्केका युवालाई यही स्वरोजगार बनाउने कार्यक्रम शुरु गरौँ, स्वदेशमै प्रशस्त अवसर भएमा वैदेशिक रोजगारी आफै हट्छ ।
बोर्डका कार्यकारी निर्देशक राजनप्रसाद श्रेष्ठले वैदेशिक रोजगारीमा गएका कामदार तथा तिनका परिवारको अधिकतम् हकहितको रक्षा, सीपयुक्त जनशक्ति निर्माण, वैदेशिक रोजगारलाई सुरक्षित, व्यवस्थित र तुलनात्मक रुपमा बढी लाभदायी बनाउन तथा स्वदेश फर्किएका कामदारलाई सामाजिक तथा आर्थिक पुनःएकीकरणका कार्यक्रममार्फत स्वरोजगार हुने वातावरण सिर्जना गर्न बोर्ड क्रियाशील रहेको बताए ।
उक्त कार्यक्रममा बोर्डको दशौं बर्ष पुगेको अवसरमा प्रकाशित स्मारिकाको समेत विमोचन गरिएको थियो ।
