तुलसीपुर, पुस ५ । आगामी शैक्षिक सत्रबाट प्राविधिक कक्षा सञ्चालनका लागि तुलसीपुर उपमहानगरपालिकाले अनुमति प्राप्त गरेको छ ।
शिक्षामन्त्री गिरिराजमणि पोख्रेलको अध्यक्षतामा बसेको प्राविधिक शिक्षा तथा व्यावसायिक तालीम परिषद् (सिटिइभिटी) परिषद् बैठकबाट भएको निर्णय अनुसार उपमहानगरपालिकाले आगामी शैक्षिक सत्रबाट प्राविधिक कक्षा सञ्चालन गर्ने नगर प्रमुख घनश्याम पाण्डेले बताए ।
तुलसीपुर उपमहानगरपालिकालाई बहुप्राविधिक शिक्षालय सञ्चालनका लागि पूर्वाधार निर्माण गर्न बैठकले अनुमति प्रदान गरेको हो ।
आगामी शैक्षिक सत्रबाट सञ्चालन हुने गरी वन विज्ञानमा डिप्लोमा तहलगायत अन्य विषयको पूर्वाधार निर्माणका लागि काम अगाडि बढाउन अनुमति दिने बैठकको निर्णय भएको छ ।
प्राविधिक शिक्षा सञ्चालनका लागि तुलसीपुर उपमहानगरपालिकाले तुलसीपुर टेक्निकल कलेज स्थापनालाई जोड दिएको थियो । उपमहानगरपालिकाले कलेज सञ्चालनका लागि वडा नं १२ को हरिपौरीमा जग्गासमेत भाडामा लिइसकेको छ ।
