काठमाडौँ, पुस ६ । शहीद स्मारक ‘ए’ डिभिजन लिग फुटबल प्रतियोगिताको १०औँ चरणका खेल आजदेखि हुनेछन् ।१०औँ चरणमा शुक्रबार तीन, शनिबार र आइतबार दुई/दुई खेल हुने अखिल नेपाल फुटबल संघ (एन्फा)ले बताएको छ ।
शुक्रबार हुने पहिलो खेलमा सरस्वती युथ क्लब र मच्छिन्द्र क्लब तथा दोस्रो खेलमा हिमालयन शेर्पा क्लब र फ्रेण्ड्स क्लब भिड्ने छन् । दुवै खेल एन्फा मैदान सातदोबाटोमा हुनेछन् । तेस्रो खेल जावलाखेल युथ क्लब र न्यूरोड टिम एनआरटीबीच हुनेछ ।
खेल हल्चोकस्थित सशस्त्र प्रहरी बलको खेलमैदानमा हुनेछ । त्यसैगरी शनिबार दुई खेल हुनेछन् । पहिलो खेलमा थ्रीस्टार र च्यासल युथ क्लबबीच खेल हुनेछ भने दोस्रो खेल सङ्कटा क्लब र ब्रिगेड ब्वाइजबीच हुनेछ ।
दुवै खेल हल्चोकस्थित सशस्त्र प्रहरी बलको खेलमैदानमा हुनेछ । दशौँ चरणको अन्तिम खेल आइतबार हुनेछन् । आइतबार हुने पहिलो खेलमा दुई विभागीय टोली त्रिभुवन आर्मी र एपिएफ प्रतिस्पर्धा गर्नेछन् भने दोस्रो खेलमा नेपाल पुलिस मनाङमस्र्याङ्दी क्लब भिड्दैछन् ।
लिगअन्तर्गत नवौँ चरणका खेल सकिँदासम्म मनाङ शतप्रतिशत नतिजासहित २७ अङ्कको साथ तालीकाको शीर्ष स्थानमा रहेको छ । मनाङलाई पछ्याइरहेको सङ्कटाको २४ अङ्क रहेको छ ।
२२ अङ्कका सात थ्रीस्टार तेस्रो, १८ अङ्कका साथ त्रिभुवन आर्मी चौथो, १५ अङ्कसहित नेपाल पुलिस पाँचौँ, १४ अङ्कका साथ हिमालयन शेर्पा छैटौँ, १३ अङ्कका साथ च्यासल युथ क्लब सातौँ स्थानमा छन् ।
यसैगरी १३ अङ्कका साथ एपिएफ आठौँ, १० अङ्कका साथ सरस्वती नवौँ, आठ अङ्कका साथ जावलाखेल युथ क्लब १०औँ, ब्रिगेड ब्वाइज, फ्रेण्डस, मच्छिन्द्र र न्यूरोड टिम (एनआरटी) क्रमशः ५, ५, ३ र १ अङ्कसहित ११औँ, १२औँ, १३औँ र १४औँ स्थानमा छन् ।
लिगको कूल ९१ खेलमध्ये हालसम्म ६२ खेल सकिइसकेको छ भने अब २९ खेल बाँकी छन् ।
