पोखरा, पुस ६ । हिन्दूराष्ट्र, राजसंस्था पुनःस्थापना र संघीयता खारेजीको माग गर्दै यही फागुन ७ गतेदेखि पार्टीले शान्तिपूर्ण रुपमा देशव्यापी जनसंघर्षको अभियान थाल्ने राष्ट्रिय प्रजातन्त्र पार्टीका अध्यक्ष कमल थापाले बताएका छन् ।
मिडिया नेपाल कास्की शाखाले शुक्रबार पोखरामा आयोजना गरेको पत्रकार भेटघाट कार्यक्रममा बोल्दै पार्टीले गर्ने जनसंघर्ष कुनै धर्म, सरकार एवं पार्टीका विरुद्धमा नभई जनताको आस्था, विश्वास र पहिचानका लागि भएको बताए ।
नेपाली कांग्रेस महासमिति बैठकमा हिन्दूराष्ट्रको पक्षमा हस्ताक्षर गरेको खबर प्राप्त भएको भन्दै अध्यक्ष थापाले कांग्रेस महासमिति बैठकले हिन्दूराष्ट्रको पक्षमा साहसिक निर्णय गर्ने अपेक्षा लिइएको बताए ।
मुलुकको सामाजिक, साँस्कृतिक क्षेत्रका साथै राजनीतिक दलमा पनि हिन्दूराष्ट्रका पक्षमा झुकाव बढेको बताउँदै उनले नेपाली कांग्रेसले हिन्दूराष्ट्रको पक्षमा निर्णय गरेमा सहकार्य गरेर अगडि बढ्न सकिनेमा जोड दिए ।
शान्ति सुरक्षालाई बलियो बनाउँदै भ्रष्टाचार नियन्त्रण गरी सुशासनको मुद्दालाई शसक्त रूपमा उठाउने बताउँदै अध्यक्ष थापाले संघर्षले सशक्त जनमत एवं जन दबाव सिर्जना गर्ने विश्वास व्यक्त गरे ।
