भीमदत्तनगर, पुस १० । एकलौटी रुपमा कर्मचारी भर्ना गरेको भन्दै कञ्चनपुरको भीमदत्तनगरस्थित सुदूरपश्चिम विश्वविद्यालयको केन्द्रीय क्याम्पसका प्राध्यापकले आन्दोलन गरेका छन् ।
विश्वविद्यालय केन्द्रीय क्याम्पसका प्रमुख डा भूपेन्द्र विष्टले एकलौटी रुपमा ६ आंशिक शिक्षक प्रशासन र विभिन्न विभागका लागि भन्दै २० कर्मचारी दैनिक ज्यालादारीमा भर्ना गरेपछि प्राध्यापकहरु विधि प्रक्रिया मिचेको भन्दै आन्दोलनमा उत्रेका हुन् । नियुक्ति खारेज नभएसम्म प्राध्यापक संघले आन्दोलन जारी राख्ने बताएको छ ।
संघका संयोजक यज्ञराज पाठकले अवैधानिक नियुक्ति खारेज र प्रमुख डा विष्टको राजीनामा समेत माग गरेका छन् । उनले भने– प्रमुखले आवेदनसमेत दिने मौका नदिई गुपचुप नियुक्ति दिए ।
प्रमुखको काम, कर्तव्य र अधिकारमा क्याम्पसका लागि आवश्यक पर्ने शिक्षक, कर्मचारीको दरबन्दी कार्यकारी परिषद्मा सिफारिश गर्ने व्यवस्था भए पनि विष्टले एकलौटी रुपमा नियुक्ति दिएपछि एक सातादेखि सुदूरपश्चिम विश्वविद्यालय तनावग्रस्त बनेको छ ।
विभिन्न विद्यार्थी संगठन आन्दोलनमा रहेका बेला प्राध्यापक संघले सो विषयलाई लिएर आन्दोलनका कार्यक्रम गरेको छ । संघका ८० प्राध्यापक आन्दोलनमा रहेका संयोजक पाठकको भनाइ छ ।
विनासूचना, विनापरीक्षा कर्मचारी राख्न नपाइने र विधि प्रक्रिया मिच्ने काम भएको उनले बताएका छन् ।
क्याम्पस प्रमुख डा विष्टले आफ्नो अधिकार प्रयोग गरेर प्रक्रियासङ्गत तरिकाबाट आंशिक शिक्षक र कर्मचारी नियुक्त गरेको उनको भनाइ छ ।
