यस बर्षकै चिसो बढि, बिहानको तापक्रम १ दशमलब ४ डिग्री सेल्सियस

काठमाडौं, पुस १३ । आज (शुक्रबार) यो वर्षकै अहिले सम्मको सबैभन्दा बढी चिसो भएको मौसम पूर्वानुमान महाशाखाका मौसमविद् शान्ति कँडेलले जानकारी गराएका छन् ।

आज बिहानको तापक्रम १ दशमलब ४ डिग्री सेल्सियस रहेको थियो । गएको बुधबारको तापक्रम १ दशमलब ५ डिग्री सेल्सियस रहेको थियो । हिजोको तापक्रम भने बढेर ५ दशमलब ५ डिग्री सेल्सियस पुगेको थियो । आज भने फेरि तापक्रम घटेको हो ।

चिसो बढेका कारण राजधानी काठमाडौं उपत्यकामा रुघा खोकीका बिरामी पनि केही दिन यता बढेको अस्पतालहरुको तथ्यांकले देखाएको छ । चिसो बढेसँगै बिहान तथा बेलुका सडकमा सवारी साधन तथा पैदल यात्रुको चाप कम हुन थालेको छ ।