चितवन, पुस १३ । सौराहामा जारी हात्ती महोत्सवअन्तर्गत आज (शुक्रबार) हात्ती फुटबल प्रतियोगिता सम्पन्न भएको छ । प्रतियोगिता एनआईसी एशिया बैंक र कुमारी बैंकबीच भएको थियो । निर्धारित ३० मिनेटको खेलमा २–२ गोल भएपछि खेल पेनाल्टीमा गएको थियो । तर, पेनाल्टीमा पनि खेल बराबरी भए पछि टस गरेर विजेता छनोट गरिएको थियो ।
टस जितेर एनआईसी एशियाले प्रतियोगिता जित हासिल गरेको छ । अङ्ग्रेजी नयाँ वर्षको अवसर पारी आन्तरिक तथा बाह्य पर्यटन प्रवद्र्धन गर्दै लोप हुँदै गएको हात्तीको संरक्षण र यसको महत्वबारे जानकारी दिन तथा वन्यजन्तु संरक्षणमा एकजुट हुनका लागि चितवन हात्ती महोत्सव गरिएको होटल संघ सौराहका अध्यक्ष सुमन घिमिरेले जानकारी गराए ।
महोत्सवका क्रममा ‘साहित्य र पर्यटन’ विषयक विशेष कार्यक्रम आयोजना गरिनेछ । स्थानीय युनाइटेड हात्ती सञ्चालन सहकारी संस्था, बाघमारा सामुदायिक वन, सौराहा बचत तथा ऋण सहकारी संस्था, रेवान सौराहा, राष्ट्रिय प्रकृति संरक्षण कोषलगायतको सहकार्यमा महोत्सव आयोजना भएको हो ।
