काठमाडौँ, साउन १२ । निर्वाचन क्षेत्र निर्धारण गर्दा राजनीतिक हस्तक्षेप, स्वार्थ र दबाबबाट मुक्त हुन र समयमा नै काम गरिसक्न नेकपा (एमाले) स्थायी कमिटीको आज बसेको बैठकले निर्वाचन क्षेत्र निर्धारण आयोगलाई ध्यानाकर्षण गराउने निर्णय गरेको छ ।
पार्टी स्थायी कमिटी बैठकले तोकिएकै समयसीमा भित्र निर्वाचन क्षेत्र निर्धारण गरिसक्न निर्वाचन क्षेत्र निर्धारण आयोगलाई आग्रह गरेको हो । सरकारले गत साता ४५ दिनको समय दिदै सो आयोग गठन गरेको थियो । वामदेव गौतमको अध्यक्षतामा पार्टी केन्द्रीय कार्यालय धुम्बाराहीमा आज बसेको बैठकले सरकारले निकै ढिलो गरेर आयोग गठन गरेकाले त्यससम्बन्धी काम निर्धारित समयमा सम्पन्न हुन नसकेर २०७४ माघ ७ भित्रै तीनै तहको निर्वाचन सम्पन्न गर्नुपर्ने संविधानले तोकेको दायित्व पूरा नहुने आशंका पैदा भएको पनि ठहर गरेको छ ।
एमालेका केन्द्रीय सचिव प्रदीप ज्ञवालीले जारी गरेको विज्ञप्तिमा जिल्ला समन्वय समितिको निर्वाचन अन्तर्गत पर्वत जिल्लामा मनोहर पौडेल विश्वकर्मालाई प्रमुख तथा यमकुमारी रानालाई उपप्रमुख एवं मुस्ताङ जिल्लामा छिरिङल्हामु गुरुङलाई प्रमुख र रिञ्जिन नाम्गेल गुरुङलाई उपप्रमुखको उम्मेदवार बनाउने निर्णय भएको बताइएको छ ।
