ललितपुर, माघ २ । प्रधानमन्त्री केपी शर्मा ओलीले बुधबार पाटन दरबार क्षेत्रको अवलोकन भ्रमण गरी त्यस क्षेत्रको सम्पदाको पुनःनिर्माणको अवस्थाका बारेमा जानकारी लिएका छन् । २१औँ राष्ट्रिय भूकम्प सुरक्षा दिवसका अवसर पारेर ललितपुर महानगरपालिकाका प्रमुख चिरिबाबु महर्जनको आग्रहमा विसं २०७२ को भूकम्पले क्षतिग्रस्त बनाएका स्मारकको पुनःनिर्माणको प्रगतिको अवलोकन गर्न प्रधानमन्त्री ओलीले पाटन दरबार क्षेत्रको भ्रमण गरेका हुन् ।
भ्रमणका क्रममा प्रधानमन्त्री ओलीले ललितपुरमा रहेका स्मारकको पुनःनिर्माण सन्तोषजनक रुपमा अघि बढेको जानकारी गराएका छन् । पुनःनिर्माण जति सक्दो छिटो सम्पन्न गर्नका लागिसबै दत्तचित्त भएर लाग्न उनले निर्देशन दिएका छन् । उनले सरकारले धार्मिक र सांस्कृतिक क्षेत्रको पुनःनिर्माणका लागि प्राथमिकता दिइरहेको जानकारी गराउँदै काठमाडौँ उपत्यकाका अघि बढ्न नसकेका स्मारकको पुनःनिर्माण चाँडो शुरु गर्ने प्रतिबद्धता जाहेर गरेका छन् ।
पुनःनिर्माणलाई गति दिनका लागि जनप्रतिनिधि, स्थानीय तह, राष्ट्रिय पुनःनिर्माण प्राधिकरण र जनता सबैको भूमिका बराबर रहने उनले बताएका छन् । विश्वसम्पदा सूचीमा ३५ औं स्थानमा सूचीकृत यस क्षेत्रमा रहेका स्मारक र पुनःनिर्माणको अवस्थाका बारेमा नगरप्रमुख महर्जनले प्रधानमन्त्री ओलीलाई जानकारी गराएका थिए ।
गृहमन्त्री अध्यक्ष हुने ‘२१ औँ राष्ट्रिय भूकम्प सुरक्षा दिवस मूल समारोह समिति’ को व्यवस्थापन उपसमितिको संयोजक ललितपुर महानगरपालिकाका प्रमुख महर्जन रहेका छन् । सरकारले वर्षेनी माघ २ गतेलाई राष्ट्रिय भूकम्प सुरक्षा दिवसका रुपमा सचेतनामूलक कार्यक्रम गरेर मनाउँदै आएको छ । सोहि अवसरमा ललितपुरमा पनि हिजो सो कार्यक्रम भव्य रुपमा सम्पन्न भएको थियो ।
