नारायणपुर, माघ ३ । आयोजना सञ्चालन हुन नसक्दा विकास बजेट खर्च हुन नसकेको नेपाली कांग्रेसका नेता डा रामशरण महतले बताएका छन् । घोराहीमा नेता महतले विगतको सरकारले शुरु गरेका अधिकांश आयोजना अहिले अलपत्र अवस्थामा रहेको जानकारी गराए । विगतको सरकारले देशभर १२÷१३ हजार सानाठूला आयोजना शुरु गरेको बताएका छन् ।
ती आयोजना अहिले अलपत्र अवस्थामा रहेको स्पष्ट पार्दै उनले भने, विकास बजेट कसरी खर्च हुन्छ ? आयोजनाको काम शुरु भएपछि बजेट खर्च देखिने हो । विकास ठप्प छ, सरकारले कि पुराना आयोजनाको काम नै हुँदैन भन्नुप¥यो होइन भने स्थानीय सरकारलाई ती आयोजनाको जिम्मा लगाउनुप¥यो ।
सरकारले सम्पूर्ण आयोजनालाई पार्टीकरण तथा नेताकरण गर्न खोजेकोसमेत उनले आरोप लगाएका छन् । कांग्रेसको नेतृत्वमा शुरु भएका आयोजनासमेत सरकारले आफ्नो पार्टीको नेताको नामबाट नामकरण गरेको उनको आरोप लगाएका छन् । नेता महतले अहिले संविधान कार्यान्वयनमा समेत समस्या देखिएको भन्दै नयाँ लगानीकर्ता निराश अवस्थामा रहेको स्पष्ट पारे ।
सरकारले भाषणमा नयाँ लगानीकर्तालाई प्रवद्र्धन गर्ने योजना बनाएको छ भन्ने सुनिन्थ्यो, तर अहिले निजी क्षेत्र भागाभागको अवस्थामा छ, निराश छ, नेता महतले भने, सरकारले निजी क्षेत्र लगानीलाई प्रोत्साहन गर्नैपर्छ । उनले कांग्रेसभित्र ठूलो समस्या रहेकोसमेत जानकारी गराएका छन् ।
पछिल्लो समय कांग्रेस धेरै पछाडि परेको भन्दै उनले नेतृत्वमा सुधार ल्याउन आवश्यक रहेको प्रस्ट्याए । कांग्रेस अहिले धेरै पछि परेको बताउँदै उनले भने, पार्टीको भित्री व्यवस्थापन र नेतृत्वमा समस्या छ, नेतृत्वमा सुधार गर्दै जाने, व्यवस्थापन गर्दै जाने कुरामा हामीले कोशिश गरि राखेका छौँ र कांग्रेस नयाँ दिशामा अगाडि बढ्छ ।
साथै उनले वाइड बडी विमान प्रकरणमा पार्टीका सभापति संलग्न रहेको कुरा सञ्चारमाध्यममा आएजस्तो सत्य नभएको जिकिर गरेका छन् । नेता महतले छानबिन समितिको अध्ययन र अदालतको प्रक्रियाले पुष्टि गर्नेसमेत प्रस्ट पारेका छन् ।
