पर्वत, माघ ४ । नेपालको दक्षिण पर्वतको बिहादी गाउँपालिका–४ र ५ मा पर्ने वहाकी र उरामपोखराको जङ्गलमा आगालागी भएको जानकारी पाइएको छ ।
बिहिबार बिहान ९ बजेदेखि स्थानीय ल्होल्से सामुदायिक वन र सालघारी सामुदायिक वनमा आगलागी भएको अझै नियन्त्रणमा आउन नसकेको बताइएको छ । उक्त वनमा लागेको आगोले सयौँ हेक्टर वन नष्ट गरिसकेको स्थानीयवासीले बताएका छन् ।
आगो अहिले सालघारीमाथिको भीरमा लागिरहेको छ । विहादी–४ वहाकीको लिङ्सिङ, तलातुम र बिहादी– ५ उरामपोखरा लुगरिङ र भतेरपाटाका बासिन्दा आगलागीको जोखिममा पर्नसक्ने स्थानीय प्रहरी चौकीको दाबी छ । सो आगलागीबाट उनीहरुलाई सतर्क रहन प्रहरीले बताएका छन् ।
आगलागी बस्तीभन्दा निकै माथि पट्टिको पहाडमा लागेको हुनाले नियन्त्रणमा लिन गाह्रो भएको स्थानीयवासीको भनाइ छ । आगो नियन्त्रणमा नलिने हो भने हजारौँ हेक्टर क्षेत्रफलमा फैलिएको जङ्गलको नष्ट हुने अर्का स्थानीय दिनेश भुसालले बताए ।
