चितवन, माघ ४ । लोकतन्त्र, राष्ट्रियता, सुशासन, शान्ति सुरक्षा र विकासका सवालमा सम्पूर्ण पार्टी एक भएर अगाडि बढ्नुपर्नेमा नेपाली कांग्रेसका वरिष्ठ नेता रामचन्द्र पौडेलले बताएका छन् । पौडेलले जनताका समस्याहरु देखिएका ठाउँमा कांग्रेसले आवाज उठाउने जानकारी गराएका छन् । उनले सरकार ठीक बाटोमा आउँदैन भने ठीक ठाउँमा ल्याउन कांग्रेस कम्मर कसेर अगाडि बढ्ने बताएका छन् । जनताका आवाजलाई सधैँ दवाउन नसकिने बताउँदै उनले भने, देशका समस्यामा लापरवाही गर्न पाइदैन र त्यसका लागि प्रतिपक्षले भूमिका निर्वाह गर्छ ।
देशका समस्यामा लापरवाही भए जनताले पनि आफ्नो तर्फबाट आवाज उठाउँने उनले जानकारी गराए । उनले जनताले सरकारलाई सही बाटोमा हिँडाउनलाई जवरजस्ती प्रयास गर्न सक्ने समेत औंल्याएका छन् । दूरदराजका जनताले पनि स्वास्थ्य सुविधा पाउनुपर्छ भन्ने डा गोविन्द केसीका मागप्रति सरकारले वेवास्ता गरेको स्पष्ट पार्दै उनले भने, दूरदराजमा रहेका जनतालाई पनि गुणस्तरीय स्वास्थ्य सेवा प्राप्त हुनु पर्छ । संविधानले समाजवाद उन्मुख व्यवस्था भनेको छ । त्यो अनुरुप सबै विपन्न जनताले सेवा पाउनुपर्छ भन्ने उनको मागलाई सरकारकाले वेवास्ता गरेको छ । यस्तो कार्य सरासर संविधान विपरित भएको उनले स्पष्ट पारेका छन् ।
गिरिजाप्रसाद श्वासप्रश्वास केन्द्र र सुशील कोइराला क्यान्सर अस्पताललाई पनि सरकारले लगभग विघटन गर्न लागेको प्रष्ट्याउँदै उनले भने, सरकार दुई वटा अस्पताल खारेजी गर्न उन्मुख हुँदैछ । वाइड बडी, सुनकाण्ड, भ्रष्टाचारका काण्ड अगाडि आइरहेको भन्दै उनले सरकार यस्ता घटनाको ढाकछोप गर्न लागेको आरोप लगाएका छन् । पार्टीभित्र केही कुरामा फरक मत भई नै रहने समेत उनले जानकारी गराएका छन् ।
केही कुराहरु नेतृत्वको गतिविधलाई मन नपरेको स्पष्ट पार्दै उनले भने, विवाद हुँदाहुँदै पनि पार्टी अहिलेका लोकतन्त्र, राष्ट्रियता र सुशासनको सवालमा एक हुन्छ । महासमिति बैठकले एकताको सन्देश दिएको जानकारी गरउँदै उनले भने, त्यो कुरा तलसम्म आउनुपर्छ । लोकतन्त्र र मुलुकको रक्षा गर्नु कांग्रेसको दायित्व हो ।
