सुर्खेत, माघ १८ । कर्णाली प्रदेश सरकार, आन्तरिक मामिला तथा कानून मन्त्रालय र कर्णाली प्रदेश प्रहरी कार्यालय सुर्खेतबीच बिहीबार एक समझदारी पत्रमा हस्ताक्षर भएको जानकारी पाइएको छ ।
कर्णाली प्रदेशभरि प्रहरी संरचना निर्माणका लागि बजेट निकासा दिएपछि कानून मन्त्रालयले मन्त्रालयका सचिव तोयनारायण सुवेदी र कर्णाली प्रदेश कार्यालयका प्रहरी प्रमुख प्रहरी नायव महानिरीक्षक महेशविक्रम शाहले समझदारी पत्रमा हस्ताक्षर गरेका हुन् । समझदारी पत्रमा हस्ताक्षर भएसँगै अब कर्णाली प्रदेशमा १४ वटा प्रहरी एकाइ निर्माण हुने सचिव सुवेदीले प्रष्ट्याएका छन् ।
कर्णाली प्रदेशका १० जिल्लामा १४ प्रहरी एकाइ बन्नेछन् । यसका लागि चालु आर्थिक वर्षमा रु १५ करोड बजेट निकासा दिने तयारी भएको सचिव सुवेदीले जानकारी गराएका छन् । संरचना निर्माणका लागि ढिलो नगरी काम अघि बढाउन प्रदेश प्रहरी कार्यालयलाई निर्देशन तथा सुझाव दिइएको उनले बताए ।
यस वर्षका लागि आन्तरिक मामिला मन्त्रालयले दिएको रु १५ करोडको बजेटको बोलपत्र यही फागुन पहिलो साताभित्र गरिसक्ने प्रहरी प्रदेश कार्यालयका प्रहरी निरीक्षक एवं इञ्जिनीयर विजयकुमार महासेठले जानकारी गराए । प्रदेशभरिका सबै प्रहरी युनिटको विस्तृत परियोजना प्रतिवेदन तयार भइसकेकोले बोलपत्र प्रक्रियालाई तीव्रता दिएर संरचना निर्माणमा लाग्ने उनको तर्क छ । प्रदेशभरि निर्माण हुने सबै प्रहरी युनिटका लागि अनुमानित रु ६२ करोड बजेट सरकारले व्यवस्था गर्नुपर्ने उनले भने ।
प्रदेशभरि बन्ने प्रदेश संरचनाले शान्ति सुरक्षाको बलियो आधार निर्माण हुने विश्वास आन्तरिक मामिला तथा कानूनमन्त्री नरेश भण्डारीले व्यक्त गरे । कानूनमन्त्री भण्डारीले प्रदेश सरकारले ‘समृद्धिका लागि शान्ति सुरक्षा’ अभियान थालेको समेत बताएका छन् ।
