काठमाडौँ, माघ २१ । धनगढीमा हुने धनगढी प्रिमियर लिग (डिपिएल) क्रिकेट प्रतियोगिताका लागि धनगढी स्टार्सले यही माघ २६ देखि फागुन ११ गतेसम्म दुई विदेशी खेलाडी क्लबमा ल्याएको छ ।
संयुक्त अरब इमिरेट्स (युएइ)का कप्तान रोहन मुस्तफा र भारतका सागर त्रिवेदीलाई आफ्नो टिममा क्लबले भित्र्याएको जानकारी पाइएको छ । युएइ राष्ट्रिय टोलीका लागि २७ एकदिवसीय अन्तर्राष्ट्रिय र २५ टी–२० अन्तर्राष्ट्रिय खेल अलराउन्डर मुस्तफाले खेलिसकेका छन् ।
सागर त्रिवेदी अलराउन्डर खेलाडी हुन् । सन् २०१५ को इन्डियन प्रिमियर लिग (आइपिएल) मा राजस्थान रोयल्सको लागि छनौट भएका खेलाडी हुन् । राष्ट्रिय टोलीका रणनीतिक खेलाडी (मार्की प्लेयर) अलराउण्डर सोमपाल कामी रहेको धनगढीमा अन्य खेलाडी पवन सर्राफ, दिपेश श्रेष्ठ, सौरभ खनाल, विपिन खत्री, हरिबहादुर चौहान, अमित श्रेष्ठ, राजु रिजाल, रोविन क्षेत्री, सुनील धमला, सन्दीप रजाली र धिरज छन् ।
प्रतियोगिता टी–२० को आधारमा हुनेछ । अरु टोलीसँग एक–एक खेल लिग चरणमा प्रत्येक टोलीले खेल्ने छन् । शीर्ष चार टोली प्ले–अफमा पुग्नेछन् । त्यसमा पहिलो र दोस्रो हुने टोलीको विजेता फाइनल पुग्नेछ । तेस्रो र चौथो हुने टोलीसँगको विजेतासँग फाइनल प्रवेशको लागि त्यसमा पराजित हुने टोलीले खेल्नेछ । प्रतियोगितामा कुल १९ खेल रहनेछ ।
देशकै सर्वाधिक ठूलो धनराशि पुरस्कारको क्रिकेट प्रतियोगिताको रूपमा २०७३ र २०७४ सालमा डिपिएलको पहिलो र दोस्रो संस्करण भएको थियो । चौराह धनगढी टोलीले दुवै संस्करणको उपाधि हात पारेको थियो ।
