ललितपुर, माघ २४ । ललितपुर महानगरपालिकाका मेयर चिरीबाबु महर्जनले शिक्षालाई प्रतिस्पर्धात्मक बनाउँदै लैजाने नीति महानगरले लिने जानकारी गराएका छन् । विहिवार आयोजित निजी तथा आवासीय विद्यालय अर्गनाइजेन प्याव्सन ललितपुरको ललितपुर महानगरपालिका समितिको अधिवेशनलाई सम्बोधन गर्दै मेयर महर्जनले शिक्षा क्षेत्रमा निजी क्षेत्रलाई नामेट पार्ने उद्देश्यका साथ आएको उच्च शिक्षा आयोगको प्रतिवेदनले सकरात्मक प्रभाव नपार्ने पनि वताएका छन्।
उच्च स्तरीय शिक्षा आयोगको प्रतिवेदन ज्यादै त्रुटीपूर्ण रहेको औँल्याउँदै उनले भने, अहिलेको प्रतिस्पर्धात्मक युगमा प्रतिवन्ध सकरात्मक हुनै सक्दैन। मेयर महर्जनले यस किसिमको कार्यले शिक्षाको नाममा स्वदेशी पूँजी विदेशिने कार्यलाई क्रमलाई प्रोत्साहित गर्ने जानकारी गराएका छन् । मेयर महर्जनले ललितपुर महानगरपालिकाले शिक्षा क्षेत्रमा निजी क्षेत्रलाई पनि संगसंगै लिएर अगाडि बढ्ने समेत प्रष्ट पारेका छन् ।
शिक्षा क्षेत्रमा सामुदायिक विद्यालयलाई प्राथामिकता दिनु पर्नेमा जोड दिँदै उनले भने, यसको अर्थ निजी विद्यालयहरुले गरेको लगानीलाई बेवास्ता गर्नु पर्छ नै भन्ने छैन। मेयर महर्जनले शिक्षा क्षेत्रमा निजी विद्यालयले गरेको लगानी र योगदानलाई प्रशंसा गर्दै धन्यवाद दिनु पर्ने वताएका छन् । उनले सामुदायिक विद्यालयलाई प्रोत्सान गर्नका लागि अरबौको लगानी भएको र २ लाख भन्दा पनि जनशक्तिहरुको रोजीरोटीको व्यवस्था भएको निजी शिक्षण संस्थाहरुलाई तहसनहस पर्न नहुने जिकिर गरे ।
त्यस्तै उपमेयर गीता सत्यालले ललितपुर शिक्षा क्षेत्रको ‘हब’ भएको बताएकी छिन् । उपमेयर सत्यालले शिक्षा विना विकास सम्भव नभएको बताउँदै भनिन्, ‘शिक्षा क्षेत्रमा उत्कृष्ट नीति निर्माणका लागि हामी यस क्षेत्रका विज्ञहरु र सरोकारवालाहरुसंग समन्वय र सहकार्य गरेर अगाडि बढ्छौं।’ उपमेयर सत्यालले निजी शिक्षण संस्थाहरुले विदेशी विद्यार्थीहरुलाई पनि नेपालमा आकर्षित गर्न सक्नु पर्नेमा जोड दिएकी छिन् । उनले अन्य नगरपालिकाहरुको तुलनामा ललितपुर महानगरपालिकामा शिक्षण संस्थाहरु धेरै रहेको स्पष्ट समेत पारिन् ।
उपमेयर सत्यालले ललितपुर महानगरपालिकाले शिक्षा क्षेत्रमा निजी र सामुदायिक विद्यालयहरुलाई पक्षपात रहित ढंगले संगसंगै समेट्दै लैजाने र त्यही अनुरुप कार्यनीतिहरु तय गर्ने गराएकी छिन् ।
त्यसैगरी प्याब्यसनका बरिष्ठ उपाध्यक्ष डि के ढुंगानाले शिक्षा क्षेत्रमा निजी क्षेत्रको ५ खर्व लगानी रहेको र २ लाख भन्दा बढि व्यक्तिहरुले रोजगारी पाइरहेको उल्लेख गरे । प्याब्यसनका बरिष्ठ उपाध्यक्ष ढुंगानाले वार्षिक २१ हजार विद्यार्थीहरु नेपालबाट भारतमा पढ्न जाने गरेको र उनीहरुबाट १२ करोड रुपैयाँ बाहिरिने गरेको वताएका छन् । उनले भने, ‘राज्यले निजी क्षेत्रलाई समेट्ने भन्दा पनि उपेक्षा गरेको छ, हामीले गरेको लगानीको उपेक्षा गरेर कसरी समृद्धि हासिल हुन्छ।
त्यसैगरी प्याब्सन ललितपुरका अध्यक्ष शिव कार्कीले नेताका छोराछोरी विदेशका पढाउने र नेपालका निजी शिक्षण संस्थाहरुको घाँटी निमोठ्ने कार्य जारी रहेसम्म शिक्षा क्षेत्रमा उल्लेख्य प्रगति नहुने वताए। उनले नेपाल शिक्षा क्षेत्रको ‘हब’ बन्न सक्ने पनि वताए। अध्यक्ष कार्कीले राज्यको स्थायी नीति नभएका कारण निजी शिक्षण संस्थाहरुका लगानीकर्ताहरुको लगानीको सुनिश्चितता नभएको गुनासो व्यक्त गरे।
