नेपाल विद्यार्थी संघका सभापति नैनसिंह महरले आफ्नो पदबाट राजीनामा दिएका छन् । कांग्रेसको केन्द्रीय समिति बैठक जारी रहँदा सोमबार दिउँसो सभापति महरले पार्टी सभापति शेरबहादुर देउवालाई राजीनामा बुझाई उनी पदमुक्त भएका हुन् ।
११ औं महाधिवेशनबाट नेविसंघ सभापति भएका महरले आफ्नो कार्यकाल पूरा भई थपिएको पाँच महिने अवधिमा पनि १२ औं महाधिवेशन गर्न नसकेपछि संगठनभित्र र पार्टीमा चर्को आलोचना र विरोध भएको थियो ।
महरले सभापति देउवालाई बुझाएको राजीनामा पत्रमा, ’१२ औं महाधिवेशन र स्ववियु निर्वाचन सम्पन्न गर्ने अर्जुन दृष्टि हुँदाहुँदै विधानअनुसार नेविसंघको कार्यकाल सकिएको र पार्टीभित्र नेविसंघबारे मतान्तर भएकोले’ राजीनामा दिएको बताएका छन् ।
अब पार्टीको सक्रिय राजनीतिमा लाग्ने समेत महरले प्रस्ट्याएका छन् । महरले दुई पटकसम्म नेविसंघको महाधिवेशन कार्यतालिका सार्वजानिक गरे पनि महाधिवेशन गर्न असर्मथ भएका थिए । पार्टी र संगठनको हितका लागि आफुले राजीनामा दिएकको उनले बताएका छन् ।
