काठमाडौँ, साउन २० । आजको व्यवस्थापिका–संसद्को बैठकमा सांसदहरुले समसामयिक विषयमा सरकरको ध्यानार्षण गराएका छन् ।
उक्त बैठकमा सांसद बलबहादुर महतले जुम्लामा मन्दिरबाट मूर्ति चोरी भएको घटनाको सम्बन्धमा कारबाही नभएको भन्दै सरकारको ध्यानाकर्षण गराएका छन् । सांसद बलराम अधिकारीले लुम्बिनी अन्तर्गत पर्ने हुलाकी सडक चार लेनको बनाउने भनेको तर हाल त्यसमा कटौती गरेकोप्रति सरकारको ध्यानाकर्षण गराएका छन् ।
सांसद भक्तबहादुर विश्वकर्मा खपाङीले मुलुकमा भ्रष्टाचार मात्र नभएर सुरक्षाको वातावरण पनि विग्रदै गएको भन्दै कुनै पनि अपराधीले छुटेपछि फेरी अपराध गर्ने गरेको र त्यस्ता अपराधीलाई सार्वजनिक गर्नुपर्ने माग राखे । सांसद भरतबहादुर खड्काले डोटीमा जिल्ला अस्पाताल ५० श्यैयाको बनाउने भनेर पूर्वाधार खडा भए पनि स्वीकृति नपाएको बताउँदै त्यसलाई तत्काल स्वीकृत गर्न माग गरे । सांसद विश्वनाथ अधिकारीले बढ्दै गएका दुर्घटनाका सम्बन्धमा सरकारको ध्यानकर्षण गराउँदै त्यसको न्युनिकरणका लागि आवश्यक काम गर्न माग गरे ।
सांसद भोटनीदेवी खवासले ज्येष्ठ नागरिक सबैलाई ६० वर्ष पुगेपछि समान रुपमा सामाजिक सुरक्षा भत्ता प्रदान गर्न माग राखे । सांसद मदनकुमारी शाहले राष्ट्रिय परिचयपत्रमा आमाको नाम लेख्ने व्यवस्था गर्नका लागि माग गर्दै हालसम्म घरबारविहीन मुक्तकमैयाको व्यवस्थापन गर्न आग्रह गरिन् ।
सांसद मञ्जुकुमारी चौधरीले उदयपुरमा त्रियुगा नदी नियन्त्रणको गुरु योजना बने पनि पछिल्लो पटक बजेट कटौती भएकोमा आपत्ति जनाउँदै उक्त योजना लागू गर्न माग गरिन् । यसरी आज बसेको व्यवस्थापिका संसदको बैठकमा उपस्थित सांसदहरुले समय सान्दर्भिक आ–आफ्ना मागहरु राख्दै सरकारको ध्यानाकर्षण गराएका छन् ।
