ओखलढुंगा, चैत १७ । ओखलढुंगा जिल्ला मानेभञ्ज्याङ्ग गाउँपालिका–६ हिलेपानीमा आइतबार जीप दुर्घटना हुँदा ६ जनाको घटनास्थलमा नै निधन भएको छ ।
सोलुखुम्बुबाट काठमाण्डौका लागि छुटेको रातो नम्बर प्लेट भएको बा १६ च २२०७ नम्बरको जीप दुर्घनामा परेको जिल्ला प्रहरी कार्यालय ओखलढुंगाका प्रहरी निरीक्षक राजिव श्रेष्ठले जानकारी गराएका छन् ।
ज्यान गुमाएका मध्ये चार पुरुष र दुई जना महिला रहेको श्रेष्ठले बताएका छन् । उक्त दुर्घटनामा परी एक बालकसहित तीन जना गम्भीर घाइते भएका छन् । उनीहरुको उदयपुर जिल्लाको घुर्मीस्थित आस्था मेडिकलमा उपचार भइरहेको बताइएको छ ।
दुर्घटनामा ताप्लेजुङ घर भएका ५५ वर्षीय मिङमा शेर्पा, ४५ वर्षीय सांगेल शेर्पा, काठमाडौं बौद्धका ३५ वर्षीय नर्वु शेर्पा र बौद्धकै ४० वर्षीय ङमङ शेर्पाको पहिचान खुलेको श्रेष्ठले जानकारी गराएका छन् ।
चालक कृष्ण श्रेष्ठ घाइते भएको बताइएको छ । प्रारम्भीक अनुसन्धानबाट तिव्र गतिका कारण दुर्घटना भएको हुन सक्ने देखिएको निरीक्षक श्रेष्ठले जानकारी गराएका छन् ।
