हेटौँडा, चैत २१ । लागुऔषध गाँजा तथा अन्य लागुऔषधसहित पक्राउ गरिएका तीन जनालाई जिल्ला प्रहरी कार्यालय मकवानपुरले आज सार्वजनिक गरेको छ । हेटौँडा–३ को तिनताप्के भन्ने स्थानबाट २१२ किलो गाँजा लोड गरिएको पिकअप गाडीसहित चालक र अर्को एक जनालाई प्रहरी निरीक्षक पवनकुमार झाको नेतृत्वको प्रहरी टोलीले नियन्त्रणमा लिएको जिप्रका मकवानपुरले जानकारी गराएको छ ।
पक्राउ पर्नेमा महोत्तरी बर्दिवास ११ बस्ने ३६ वर्षीय पिकअप चालक रामजस यादव र सोही ठाउँ बस्ने १९ वर्षीय उज्ज्वल गुर्मछाने मगर रहेका छन् । उनीहरुले प्लाष्टिकमा बेरेर मनहरीबाट हेटौँडातर्फ ल्याउँदै गरेको ३० वटा पोका बनाएर लुकाएर राखेको अवस्थामा गाँजा फेला परेको प्रहरीले बताएको छ ।
चितवन राप्ती नगरपालिकाका ३७ वर्षीय लक्षबहादुर राईले प्रतिबन्धित लागुऔषध नाइटोभेट १२७ ट्यबलेट, डाइजेल्याब १० एम्बुल, ब्युनोर्फिन १० एम्पुल र फेनार्गन १० एम्पुलसहित पक्राउ परेको जिल्ला प्रहरी कार्यालय मकवानपुरका प्रवक्ता प्रहरी नायब उपरीक्षक यज्ञप्रसाद भट्टराईले स्पष्ट पारेका छन् ।
