काठमाण्डौ, चैत्र २१ । चलचित्र ऐश्वर्य बाट फिल्मी जगतमा भित्रिएकी नायिका हुन् दीपिका प्रसाइँ । उनी चाँड निर्देशक दीवाकर भट्टराईसँग विवाह गर्दै्छिन् । आउने बैशाखको दोस्रो सातामा बैबाहिक जीवनमा बाँधिने तयारी भए पनि बिवाह असारसम्म पुग्ने छाँटकाँट देखिएको छ । विवाहको तयारीका लागि भन्दै यस वर्षको दशैंमा प्रदर्शनमा आएको फिल्म ‘छक्का पञ्जा ३’ पछि उनले कुनै फिल्म साइन गरेकी थिइनन् ।
लगातार दुई सुपरहिट फिल्म दिएकी दीपिकाले तेस्रो फिल्मको रुपमा भने निर्देशक एभरेष्ट सूर्य बोहोराले निर्देशन गर्ने ‘हेल्लो जिन्दगी’ मा अनुबन्ध भएकी छन् । फिल्मको सम्पूर्ण छायांकन बेलायतमा हुने निर्देशक बोहोराले बताएका छन् ।
अभिनेत्री दीपिकाले यस चलचित्रमा १० लाखको हाराहारीमा पारिश्रमिक बुझेको बताइएको छ ।
यसमा उनको जोडी चाँही को हुनेछ भन्ने कुराको खुलासा निर्माण टिमले गोप्य राखेको छ । उनीभन्दा अगाडि यो फिल्ममा अभिनेत्री श्वेता खड्का अनुबन्ध भइसकेकी छन् । उनको फिल्ममा नेगेटिभ रोल रहेको जानकारी प्राप्त छ । केही दिनमा छायांकनका लागि निर्माण टिम बेलायत प्रस्थान गर्नेछ ।
चलचित्रमा सलोन बस्नेत, विल्सन विक्रम राई, विक्रान्त बस्नेतलगायतका कलाकारहरुको पनि अभिनय रहने छ । फिल्म विरान्जना इन्टरटेन्मेन्टको ब्यानरको तल बन्नेछ । चलचित्रको कथा निर्देशक बोहोराले दिएका छन् । सृजना जोशीले निर्माण गर्ने ‘हेल्लो जिन्दगी’ लाई पुरुषोत्तम प्रधानले खिच्नेछन् भने फिल्मका गीतमा बसन्त सापकोटाको संगीत र निशान भट्टराइले स्वर रहनेछ ।
