काठमाडौँ, वैशाख २३ । बैशाख २५ गतेबाट देशव्यापि रुपमा हुन गइरकेको जागरण अभियानमा आसन र भाषणमा नेपाली कांग्रेसले महिलाको सहभागिता प्रायः शून्य रहनेगरी तय भएको कार्यतालिकाको सुभार गरिएको छ । पार्टी सभापति शेरबहादुर देउवाले जागरण अभियान अन्तर्गतका हरेक कार्यक्रममा महिलावक्ता अनिवार्य गर्न जारी गरेको पछिल्लो परिपत्रमा निर्देशन दिएका छन् ।
पार्टीका शीर्ष नेता तथा पदाधिकारीलाई ध्यानाकर्षणपत्र बुझाउँदै कांग्रेस महासमिति सदस्य निमा गिरी नेतृत्वको महिलाको टोलीले परिपत्र सच्याउन माग गर्दै नेतृत्वको ध्यानार्कषण गराएका थिए । सभापति देउवाले महिला टोलीसँगको भेटका क्रममा आफूले महिलाले मौका नै नपाउने अवस्था आउने बारेमा ख्याल नगरेको भन्दै सच्याउने आश्वासन दिएका थिए । पार्टी कार्यालयले उनको आश्वासन अनुसार सभापति देउवाकै हस्ताक्षर रहेको परिपत्र शुक्रबार जारी गर्दै हरेक कार्यक्रममा महिलावक्ता अनिवार्य गर्न निर्देशन दिएका छन् ।
कार्यक्रमलाई छोटो र छरितो बनाउने नाममा महिलाको सहभागितालाई शून्य नै बनाउन लागेको तर्फ होसियार हुँदै उनीहरुले नेतृत्वकर्ताको ध्यानार्कषण गराएका थिए । आसन र भाषणमा देशभरी महिलाले मौका नै नपाउने अवस्था देखिएपछि उनीहरुले सभापति शेरबहादुर देउवा, उपसभापति विमलेन्द्र निधि, महामन्त्री डा शशाङ्क कोइराला, कोषाध्यक्ष सीतादेवी यादव, प्रवक्ता विश्वप्रकाश शर्मा, नेत्री डिला सङ्ग्रौला, पुष्पा भुसाललगायतलाई एकहप्ता अगाडि ध्यानाकर्षणपत्र बुझाएका हुन् । जागरण अभियानका कार्यक्रममा स्वागत, विषय प्रवेश, प्रमुख वक्ता र सभापतिको मात्र आसन ग्रहण र उनीहरूकै मात्र भाषण हुने तालिका रहेकोमा अव महिलावक्ता पनि थपिएको छ ।
मञ्चमा आसन र भाषणमा महिला नभए कार्यक्रम बहिष्कार गर्नेसम्मका चेतावनी नेतृहरुले दिएपछि पार्टीले परिपत्र सच्याउन बाध्य भएको बताइएको छ । नेपाली कांग्रेसका नेतृहरुले देशको संविधान र पार्टीको विधानमा उल्लेख गरिएको समावेशीतालाई ख्याल गर्न माग गर्दै नेतृत्वको ध्यानाकर्षण गराए वमोजिम उनीहरुको भावना र संविधानको मर्म अनुसार पार्टी नेतृत्वले आफ्नो गल्ती सच्याएको छ । देशव्यापी रुपमा संचालन गर्न लागेको हिमाल, पहाड, तराई–मधेश ( हिपतम) अभियान आगामी वैशाख २५ गतेदेखि हुँदै छ ।
कांग्रेसले वैशाख ११ देखि शुरु गर्ने एक महिने राष्ट्रिय जागरण अभियान पार्टीका पूर्वकोषाध्यक्ष रामकृष्ण ताम्राकारको निधनले वैशाख २५ गतेबाट शुरु शुरु हुन लागेको हो । पार्टीको महासमिति बैठकबाट पारित नीति, कार्यक्रम र संशोधित विधानबारे पार्टीको स्थानीय तहसम्म सुसूचीत गर्ने, राष्ट्रव्यापी रुपमा पार्टीमा एकता कायम गर्दै पार्टी सुदृढीकरणका विविध गतिविधि गर्ने, कांग्रेसको नेतृत्वमा मुलुकले विगतमा हासिल गरेको उपलब्धी नागरिकमा पु¥याउने अभियानका उद्देश्य रहेका छन् ।
