ललितपुर, वैशाख २९ । चापागाउँका पुराना नेता स्वर्गीय बुद्धिबहादुर श्रेष्ठको १३ औं दिनको स्मृतिसभामा उनको योगदानको चर्चा गरिएको छ । वि.सं. १९९९ असार २६ गतेका दिन चापागाउँमा जन्मिएका श्रेष्ठको यही २०७६ साल वैशाख १६ गते निधन भएको थियो ।
स्वर्गीय बुद्धिबहादुर श्रेष्ठको सम्झनामा नेपाली काँग्रेस गोदावरी नगर कार्य समिति तथा वडा नं. ११ इकाई समितले शनिवार श्रद्धाञ्जली सभा आयोजना गरेको हो । श्रद्धाञ्जली सभामा मन्तव्य राख्दै संविधानसभाका पूर्वसभासद तथा नेपाली काँग्रेस ललितपुरका सभापति मदनबहादुर अमात्यले बुद्धिबहादुर श्रेष्ठ निस्वार्थ, त्यागी, संस्कारयुक्त राजनीति तथा समाजसेवी भएको जानकारी गराएका छन् ।
सभापति अमात्यले भने, ’उहाँ राजनीतिक व्यक्तितब मात्रै नभएर एक संस्कारयुक्त समाजसेवी हुनुहुन्थ्यो, उहाँमा ठूलो संस्कार र गुणयुक्त व्यक्तित्व थियो ।’ स्वर्गीय श्रेष्ठ सानो स्वार्थ र लोभमा नभुलिने व्यक्ति भएको भन्दै सभापति अमात्यले उहाँको अनुशरण गर्दै काँग्रेसका नेता तथा कार्यकर्ता अगाडि बढ्नुपर्ने वताए ।
नेपाली काँग्रेसका नेता तथा पूर्वअर्थराज्यमन्त्री उदय शम्शेर राणाले बुद्धिबहादुर श्रेष्ठ एक संघर्षशील महान समाजसेवी भएको वताए । नेता राणाले भने, ’उहाँको योगदानको उच्चकदर गर्दै उहाँको सद्चरित्र र सत्गुणको अनुशरण गरेर अगाडि बढ्नुपर्ने आजको अनवश्यकता छ ।
’त्यस्तै गोदावरी नगरपालिकाका मेयर गजेन्द्र महर्जनले बुद्धिबहादुर श्रेष्ठले स्थानीय स्तरको विकास निर्माण र सामाजिक काममा पुर्याएको योगदानको चर्चा गर्दै उहाँको अनुशरण गर्दै अगाडि बढ्नुपर्ने वताए । नेपाली कांग्रेसका महासमिति सदस्य तथा ललितपुरका युवा नेता मीनकृष्ण महर्जनले कठिन परिस्थितिमा पनि लगनशील भएर सामाजिक सेवामा लागेर बुद्धिबहादुर श्रेष्ठले अविस्मरणीय छाप छोडेको वताए ।
गोदावरी नगरपालिका वडा नं. ११ का वडा अध्यक्ष निलबहादुर देसारले बुद्धिबहादुर श्रेष्ठ दलीय भावना भन्दा पनि सामाजिक भावनाबाट उत्प्रेरित भएर हरेक काममा क्रियाशील हुने व्यक्तित्व भएको वताए । कार्यक्रममा गोदावरी नगरपालिकाका उपमेयर मुना अधिकारी, नेपाली काँग्रेस ललितपुरका विभिन्न तहका नेता तथा कार्यकर्ताहरुको उल्लेख्य उपस्थिति रहेको थियो ।
