सुनसरी, वैशाख २९ । प्रमुख प्रतिपक्ष दल नेपाली कांग्रेस वरिष्ठ नेता रामचन्द्र पौडेलले नैतिकवान् र इमान्दारहरुको पार्टी नेपाली कांग्रेस नै भएको बताएका छन् ।
वरिष्ठ नेता पौडेलले सुनसरीको रामधुनी नगरपालिकामा पार्टीले शनिबार आयोजना गरेको जागरण अभियान कार्यक्रमलाई सम्बोधन गर्नेै क्रममा अहिलेसम्म भ्रष्टाचारका सबै काम कुरा कम्युनिष्टहरुको सरकार भएको बेलामा भएको समेत ठोकुवा गरेका छन् ।
नेता पौडेलले कांग्रेस नैतिकवान् र इमान्दारको पार्टी भएको भन्दै सबैलाई अन्य पार्टी छोडेर कांग्रेसमा लाग्नका लागि विशेष आग्रह गरेका छन् । वरिष्ठ नेता पौडेलले पार्टीमा कुनै गुट–उपगुट नरहेकाले त्यसमा प्रस्ट हुन समेत आग्रह गरेका छन् । नेता पौडेलले कार्यकर्तामा उत्प्रेरणाको कमी रहेकाले एकमहीने जागरण अभियानमा सम्पूर्ण कार्यकतालाई पार्टीप्रतिको इमान्दारिता बढाउने कार्यमा लाग्नसमेत आग्रह गरेका थिए ।
कार्यक्रममा पार्टीका केन्द्रीय सदस्य महेश आचार्य, १ नं प्रदेशका संसदीय दलका नेता राजीव कोइराला, सङ्घीय सांसद तथा पूर्वराज्यमन्त्री सीताराम मेहता, जिल्ला सचिव केदार भण्डारीलगायतले पार्टीको जागरण कार्यक्रम र भावियोजनाका विषयमा प्रस्ट्याएका थिए ।
