भद्रपुर, ५ जेठ । आगलागीलाई तत्काल नियन्त्रण गर्न सकियोस् भनेर झापाको अर्जुनधारा नगरपालिकाले हरेक घरमा अग्निप्रतिरोधात्मक सामग्री अनिवार्यरूपमा राख्नुपर्ने नियम लागू गरेको छ ।
प्रमुख प्रशासकीय अधिकृत पङ्कज भुर्तेलले नगरपालिकाको हालै सम्पन्न नगरसभाले नगरभित्रका सबै आवासीय तथा व्यावसायिक पक्की घरमा अग्निप्रतिरोधात्मक सामग्री राख्नुपर्ने निर्णय गरेको जानकारी गराएका छन् ।
नगरपालिकाको इजाजत लिएर बनाइएका घरमा अग्निप्रतिरोधात्मक सामग्री राखेको यकिन भएपश्चात मात्र नगरपालिकाले घर निर्माण सम्पन्न भएको प्रमाणपत्र दिनेछ उनले बताए । नगरपालिकाले आगलागीबाट ठूलो नोक्सानी हुन नदिन पूर्व सावधानीका लागि गरेको निर्णय नगरवासीको हितका लागि भएको हुँदा यसको कडाइका साथ लागू हुनुपर्ने अर्जुनधारा–११ का पुण्यप्रसाद खरेलले बताए ।
१४ हजार भन्दा बढी परिवारको बसोवास नगरपालिकामा रहेको छ । नगरपालिकाले आज घरधनीलाई सार्वजनिक सूचना गरी अग्निप्रतिरोधात्मक सामग्री अनिवार्य राख्न अनुरोध समेत गरेको छ । झापाका १५ स्थानीय तहमध्ये अग्निप्रतिरोधी सामग्री अनिवार्य गर्ने अर्जुनधारा पहिलो नगरपालिका हो । नगरपालिकामा वारुणयन्त्र भने रहेको छैन ।
