काठमाडौँ, जेठ १२ । युरोपेली मुलुक अष्ट्रियाको साताव्यापी भ्रमणका लागि उपराष्ट्रपति नन्दबहादुर पुन आज बिहान सो क्षेत्र प्रस्थान गरेका छन् ।
उपराष्ट्रपति पुनलाई त्रिभुवन अन्तर्राष्ट्रिय विमानस्थलको अतिविशिष्ट कक्षमा प्रधानमन्त्री केपी शर्मा ओली, सभामुख कृष्णबहादुर महरा, नेपाल कम्युनिष्ट पार्टी (नेकपा) संसदीय दलका उपनेता सुवासचन्द्र नेम्वाङ, परराष्ट्रमन्त्री प्रदीपकुमार ज्ञवाली, परराष्ट्र सचिव शङ्करदास बैरागीले बिदाइ गरेका थिए । उपराष्ट्रपति पुनको सम्मानमा नेपाली सेनाको एक टुकुडीले सम्मानगारत अर्पण समेत गरेका थिए ।
यही जेठ १४ गते आयोजना हुने जलवायुसम्बन्धी आर–२० विश्व शिखर सम्मेलनमा सहभागी हुन अष्ट्रियाका राष्ट्रपति अलेक्जेण्डर भान द बेलेनको निमन्त्रणालाई स्वीकार गर्दै भियनामा तर्फ प्रस्थान गरेका हुन् ।
उपराष्ट्रपतिका प्रेस संयोजक मनोज घर्तीमगरले उपराष्ट्रपति पुन कतार एयरवेजको विमानमार्फत दोहा हुँदै अष्ट्रिया प्रस्थान गर्ने जानकारी गराएका छन् ।
उपराष्ट्रपति पुन जेठ १४ गते आर–२० विश्व शिखर सम्मेलनमा सहभागी भएर नेपालको धारणा व्यक्त गर्ने जनाइएको छ । उनले भ्रमणको क्रममा अष्ट्रियाका राष्ट्रपति बेलेनसँग शिष्टाचार भेटवार्ता गर्ने बताइएको छ । उपराष्ट्रपति पुन भियना अन्तर्रा्ष्ट्रिय केन्द्रको ४०औँ वार्षिकोत्सवको अवसरमा सोमबार आयोजना हुने कार्यक्रममा समेत सहभागी हुनु हुनेछ ।
अष्ट्रियामा रहँदा उपराष्ट्रपति अष्ट्रियास्थित नेपाली राजदूतावासले अन्तर्राष्ट्रिय सगरमाथा दिवसको अवसरमा आयोजना गर्ने कार्यक्रममा समेत सहभागी जनाउने भएका छन् । भ्रमण टोलीमा उपराष्ट्रपतिकी धर्मपत्नी हस्तमाली पुन, वन तथा वातावरणमन्त्री शक्तिबहादुर बस्नेतलगायतको सहभागीता रहेको छ । उनी यही जेठ १८ गते भ्रमण सम्पन्न गरी स्वदेश फर्कने जानकारी गराइएको छ ।
