काठमाडौं, जेष्ठ १४ । प्रदेश ३ ले प्रधानमन्त्री कप एक दिवसीय राष्ट्रिय क्रिकेट प्रतियोगितामा लगातार दोस्रो जीत हासिल गरेको छ । आज भएको खेलमा कीर्तिपुरस्थित त्रिवि क्रिकेट मैदानमा नेपाली राष्ट्रिय टोलीका कप्तान पारस खड्का रहेका प्रदेश ३ ले गण्डकी प्रदेशलाई ७ विकेटले पराजय गर्दै सो प्रतियोगितामा लगातार दोस्रो जीत हात पारेका हुन् ।
प्रदेश ३ ले टस जितेर पहिले ब्याटिङ गरेको गण्डकी प्रदेशले दिएको १०९ रनको सामान्य लक्ष्यलाई २२ दशमलव २ ओभरमा ३ विकेट गुमाएर भेटायो । आदील खानले प्रदेश ३ को जीतमा अविजित ३८ रन जोडे भने इशान पाण्डेले अविजित २६ तथा रित गौतमले २० रन बनाए । गण्डकीका किशोर महतोले २ विकेट लिएका थिए ।
गण्डकीले पहिले ब्याटिङ गरेको ३० दशमलव १ ओभरमा सबै विकेट गुमाउँदैै १०८ रन बनाएको थियो । सुमा घिमिरेले गण्डकीका लागि ३४ तथा आकाश थापाले २४ रन जोड्नुबाहेक अन्यले उत्कृष्ट प्रदर्शन गर्न सकेनन् ।
कप्तान पारस खड्का र सूर्य तामाङले प्रदेश ३ का लागि समान ४÷४ विकेट लिए भने नन्दनकुमार यादवले २ विकेट लिए । प्रदेश ३ ले जीतसँगै समूह ए मा ३ खेलबाट ४ अङ्क जोडेको छ भने शीर्ष स्थानमा उक्सिएको छ ।
