काठमाडौं, जेष्ठ २६ । युरोपेली मुलुकहरुको भ्रमणको लागि प्रधानमन्त्री केपी शर्मा ओली स्वीट्जरल्याण्डको जेनेभा जाने क्रममा कतारको राजधानी दोहा पुगेका छन् । त्यहाँको नेपाली दूतावासका कार्यवाहक राजदूत लक्ष्मण खनालसहितका अधिकारीहरुले दोहाको हमाद अन्तर्रा्ष्ट्रिय विमानस्थलमा प्रधानमन्त्री ओलीलाई स्वागत गरेका छन् ।
प्रधानमन्त्री ओलीका साथ उनकी धर्मपत्नी श्रीमती राधिका शाक्य पनि छन् । आज बिहान दोहाबाट जेनेभाका लागि प्रधानमन्त्री ओली जेनेभामा हुने अन्तर्रा्ष्ट्रिय श्रम सङ्गठनको शतवार्षिकी समारोहमा सहभागी हुन प्रस्थान गर्नेछन् ।
बेलायत र फ्रान्सको औपचारिक भ्रमण जेनेभापछि प्रधानमन्त्री ओलीले गर्ने कार्यक्रम रहेको छ ।
प्रधानमन्त्री ओली नेतृत्वको नेपाली प्रतिनिधिमण्डलमा परराष्ट्रमन्त्री प्रदीपकुमार ज्ञवाली, श्रम रोजगार तथा सामाजिक सुरक्षामन्त्री गोकर्ण विष्ट, प्रधानमन्त्रीका मुख्य सल्लाहकार विष्णुप्रसाद रिमाल, परराष्ट्र सल्लाहकार डा राजन भट्टराई र प्रेस सल्लाहकार डा कुन्दन अर्याल तथा सांसदहरु विमलप्रसाद श्रीवास्तव र विन्दा पाण्डेलगायत रहेका छन् ।
