काठमाडौं, असार ८ । त्रिभुवन विश्वविद्यालय (त्रिवि) व्यवस्थापन सङ्काय, डीन कार्यालयको सहयोग तथा सरस्वती बहुमुखी क्याम्पसको आयोजनामा “केश टिचिङ पाडागोजी” सम्बन्धी दुईदिने कार्यशाला सम्पन्न भएको छ ।
कार्यशालामा त्रिविका आङ्गिक तथा सम्बन्धन प्राप्त क्याम्पसहरुका व्यवस्थापन र वित्तशास्त्र विषयका ८० जना प्राध्यापकहरुले सहभागिता जनाएका थिए । कार्यशालाको उद्घाटन गर्दै व्यवस्थापन सङ्कायका डीन प्रा.डा. डिल्लीराज शर्माले विगतमा चरम राजनीतिले ग्रसित सरस्वती बहुमुखी क्याम्पस जुरुक्क उठेकोमा खुसी लागेको चर्चा गरेका थिए । उनले मुलुक परिवर्तनको लागि यसबाट शिक्षा लिनुपर्नेमा जोड दिएका छन् ।
प्रा.डा. शर्माले कार्यशालाबाट आर्जन गरेको सीप र ज्ञान व्यक्तिसँगै संस्थाले फाइदा लिनुपर्ने धारणा राखेका थिए । त्रिवि व्यवस्थापन सङ्कायका सहायक डीन दिनेशमणि घिमिरेले शैक्षिक गुणस्तरका लागि विश्वविद्यालय सही बाटोमा अघि बढिरहेको जानकारी गराएका थिए ।
नेपाल प्राध्यापक संघका सभापति रामेश्वर उपाध्यायले प्राध्यापकहरुले सैद्धान्तिक र व्यवहारिक रुपमा समय सापेक्षित बाटो देखाउनुपर्ने औंल्याएका थिए । विश्वविद्यालयबाट उत्पादित जनशक्ति देशभित्रै रहने वातावरण बनाउनुपर्नेमा उनले जोड दिएका छन् ।
नेपाल कमर्श क्याम्पसका क्याम्पस प्रमुख जीवनकुमार भट्टराईले व्यवस्थापन सङ्काय अन्तर्गतका विषयहरुमा विद्यार्थीहरुको आकर्षण दिनप्रतिदिन बढ्दै गएको सन्दर्भमा यस खालका कार्यशालाहरुले प्राध्यापकहरुको शिक्षण सिकाईलाई अझ तिखार्ने स्पष्ट पारेका थिए ।
स्वागत मन्तव्यको क्रममा सरस्वती बहुमुखी क्याम्पस, रिसर्च मेनेजमेण्ट सेल तथा बीबीए डाइरेक्टर प्रा.डा. सतीशकुमार ओझाले देशभित्र र विदेशमा फ्याकल्टीहरुले आफूलाई अब्बल सावित गर्न कार्यशालाले थप मद्दत गर्ने जानकारी गराएका थिए ।
उद्घाटन तथा समापन सत्रमा सरस्वती बहुमुखी क्याम्पसका क्याम्पस प्रमुख डा. गोलमान गुरुङले सभापतिको आशनबाट बोल्नुहुँदै शैक्षिक क्षेत्रमा न्यून भ्रष्टाचारको विधि अपनाई विद्यार्थी र प्राध्यापकहरुको गुणस्तर अभिवृद्धि गर्नेतर्फ जोड दिएका थिए ।
समापन कार्यक्रममा प्रमुख अतिथिको आशनबाट त्रिवि वित्तशास्त्र विषय समितिका अध्यक्ष प्रा.डा. बालकृष्ण श्रेष्ठले केश टिचिङ पाडागोजीमा भएको कार्यशाला पहिलो पाइलाको शुरुवात भएको बताएका थिए ।
कार्यशालामा सहभागीहरुको तर्फबाट प्रा.डा. युवाराज भट्टराई, डा.पुष्पा महर्जन, अञ्जु गौचाले मन्तव्यको क्रममा ट्रान्स्फरमेशनको नमूनाको रुपमा सरस्वती बहुमुखी क्याम्पस मुलुकमै उदाहरणीय बनेको बारे चर्चा गरेका गिए । कार्यक्रम सञ्चालन सहायक क्याम्पस प्रमुख शिवराज घिमिरेले गरेका थिए ।
कार्यशालामा केश डेभलपमेण्ट र विश्लेषणतर्फ प्रा.डा. महानन्द चालिसे, सह प्रा.डा. ध्रुवलाल पाण्डे, सह प्रा.डा. गोविन्द तामाङ तथा एमएस एक्सलतर्फ प्रा.डा. राजनबहादुर पौडेल, सञ्जय घिमिरे र भरतसिंह थापाले सहजीकरण गरेका थिए ।
