ललितपुर, असार १० । ललितपुरको एक मात्र गाउँपालिका यस्तो छ जहाँ भएका हरेक निर्णय विवाद रहित हुन्छन् । त्यो हो बागमती गाउँपालिका । उक्त गाउँपालिकाका प्रमुख र उपप्रमुख लगाएत सो मातहत रहेर काम गर्ने हरेक व्यक्तिले गर्ने सबै निर्णय जनमुखि, तमाम स्थानीयका हितमा नै हुने भएकाले पनि कुनै विवाद नभएको हुन सक्छ ।
त्यसै अनुरुप बागमती गाउँपालिकाका प्रमुख वीरबहादुर लोप्चन र उप प्रमुख रन्जना घिमिरेले आर्थिक वर्ष २०७६ र ०७७ को नीति तथा कार्यक्रम ४१ करोड २ लाख ३८ हजारको बजेट प्रस्तुत गरेका छन् । सोमबार गाउँपालिकामा भएको एक कार्यक्रम मार्फत पालिका प्रमुख लामाले सो गाउँपालिकाको पाँचौं गाउँ सभामा प्रस्तावित शीर्षक बजेट, योजना तथा कार्यक्रम पेश गरेका हुन् ।
संघीय सरकार, प्रदेश सरकार, आन्तरिक स्रोत बाट जम्मा हुनेगरी अनुमानित आय प्रक्षेपण गरी लामाले ४१ करोड २ लाख ३८ हजार रुपैयाँको बजेट प्रस्तुत गरेका छन् । जसमा अनुमानित पूँजीगत खर्चतर्फ ३५ करोड २४ लाख २८ हजार र अनुमानित चालु खर्चतर्फ पाँच करोड ७८ लाख रहेको छ ।
जसअनुसार संघीय सरकारको वित्तीय अनुदानबाट ७ करोड ६ लाख, संघीय सरकारको राजस्व बाँडफाँड बाट ५ करोड १३ लाख, प्रदेश सरकारको राजस्व बाँडफाँड १ करोड ४४ लाख, प्रदेश वित्तीय समानीकरण बाट ८९ लाख प्राप्त हुने भएको छ । त्यसैगरी रजिष्ट्रेशन दस्तुरबाट ५० लाख, आन्तरिक स्रोत (ढुंगा गिटी बालुवा) बाट २ करोड २६ लाख, जिल्ला समन्वय समितिबाट प्राप्त हुने मौज्दात कोषको रकम ४ करोड प्राप्त हुने अनुमान गरिएको छ ।
त्यस्तै संघीय सरकार र प्रदेश सरकारबाट सशर्त प्राप्त हुने १८ करोड १५ लाख ३८ हजार तथा आर्थिक वर्ष २०७५ र ०७६ बाट बाँकी हुन आउने रकम ८९ लाख यो आर्थिक वर्षमा जम्मा हुने प्रक्षेपण गरिएको छ । अघिल्लो वर्ष बजेट प्रस्तुत गर्दा गाउँपालिकाले कृषि क्षेत्रलाई प्राथमिकतामा राखेको भएपनि अहिले कृषि र पर्यटन दुवैलाई प्राथमिकतामा राखी बजेट प्रस्तुत गरेको छ ।
गाउँपालिकाले अघिल्लो वर्षकै कार्यक्रम अन्तर्गत जनतासँग अध्यक्ष कार्यक्रमलाई प्राथमिकतामा राखेर अघि बढेको छ । सो गाउँपालिका प्रमुखले सबै क्षेत्रका समस्या सामधान हुने किसिमले बजेट प्रस्तुत गरेका छन् । त्यसैगरी गाउँपालिकाले स्थानीयस्तरमा विकास निर्माण, कृषि, शिक्षा लगायत क्षेत्रमा कलम चलाउने स्थानीय पत्रकारलाई सम्मान गर्ने कार्यक्रम अघि सारेको छ ।
उक्त गाउँपालिका कृषिमा निर्भर रहेको गाउँपालिका भएकाले पनि आम नागरिकका हितमा बजेट प्रस्तुत गरिएको छ । गाउँपालिकाले उपप्रमुख महिला सशक्तिकरण, एकल पुरुष भत्ता, जनजाति उत्थान कार्यक्रम लाई प्राथमिकता दिएको छ । यसवर्ष जग्गा खरिद गरेको गाउँपालिकाले आगामी वर्षमा भवन निर्माणलाई बजेट छुट्याएको छ ।
पर्यटन विकास कार्यक्रम अन्तर्गत राडर क्षेत्रलाई विशेष प्राथमिकतामा राखी काम अघि बढाउने गरी बजेट छुट्याएको छ । त्यस्तै गाउँपालिकाले माझखण्डको रुद्रेश्वर महादेव मन्दिर निर्माण गर्न बजेटलाई प्राथमिकतामा राखेको छ । विद्यालयको शैक्षिक तथा भौतिक सुधारका लागि विद्यालय सुधार कार्यक्रम अघि सारेको छ । खेलकुद विकास कार्यक्रमअन्तर्गत गाउँपालिकाले अध्यक्ष कप खेलकुद प्रतियोगिता गर्न बजेट छुट्याएको छ ।
यसका साथै गाउँपालिकाले सडक निर्माण गर्न, बाँकी रहेका वडा र गाउँका लागि सडक निर्माण तथा स्तरउन्नती गर्न बजेट छुट्याएको छ । बागमती गाउँपालिकालाई कृषि र पर्यटनको हिसावले चिनाउने उद्देश्यले कृषि र पर्यटन क्षेत्रलाई प्राथमिकतामा राखी बजेट ल्याइएको गाउँपालिकाका प्रमुख वीरबहादुर लोप्चनले जानकारी गराएका छन् ।
पालिका भित्र रहेका कसैले पनि कुनै सेवा सुविधाबाट बञ्चित हुन नपरोस् भन्ने हेतुका साथ यस वर्षको वजेट प्रस्तुत गरिएको प्रमुख लोप्चनले सुनाए । गाउँका जनतालाई के कस्ता समस्याहरु छन, कुन क्षेत्रमा कति वजेट छुट्याउदा बेस हुन्छ भनि गहिरो अध्यायन गरेर मात्र वजेट प्रस्तुत गरेको लोप्चनले बताएका छन् । केन्द्र सरकार र प्रदेश सरकारले स्थानीय सरकारसँग समन्य र सहकार्य गरेमा गाउँको विकास गर्न थप सहज हुने उनको धारणा छ ।
राजधानीसँगै जोडिएको जिल्ला ललितपुर र सो जिल्लाको विकट नै मानिने बागमती गाउँपालिकाका लागि केन्द्रिय सरकारबाट सोचे अनुसारको सहयोग नपाएको बताउँदै उनले भनेका छन्, स्थानीय स्तरमा भएको सरकारलाई छायामा पार्ने र उनीहरुलाई सहज तरिकाले काम गर्न नदिने सम्मको खेल हुन्छ । यस्ता खेलको अन्य गर्न हामीले निकै संघर्ष गर्नु पर्ने हुन्छ ।
