काठमाडौं, असार १० । उपन्यासकार तथा लेखक देवेन्द्र न्यौपानेको चेतनामूलक उपन्यास ‘सङ्गत’ विमोचन कार्यक्रम सम्पन्न भएको छ । नेपाल प्रहरीको लागुऔषध ब्यूरोद्वारा अन्तर्राष्ट्रिय लागुऔषध दुरुपयोग तथा अवैध ओसारपसारविरुद्ध दिवसको पूर्वसन्ध्यामा सोमबार राजधानीमा आयोजित एक कार्यक्रममा लेखक न्यौपानेको उक्त उपन्यासको विमोचन गरेका हुन् ।
उपन्यास लागुऔषध ब्यूरोका प्रमुख प्रहरी नायब महानिरीक्षक दिनेश अमात्य र महानगरीय प्रहरी कार्यालयका प्रमुख एवं प्रहरी नायब महानिरीक्षक शैलेश थापा क्षेत्रीले संयुक्तरूपमा विमोचन गरेका थिए । कार्यक्रममा प्रहरी नायब महानिरीक्षक क्षेत्रीले काठमाडौँ उपत्यकामा प्राकृतिक लागुऔषधभन्दा औषधिजन्य लागुऔषधको समस्या बढ्दै गएको जानकारी गराएका थिए । महानिरीक्षक क्षेत्रीले लागुऔषधको दुरुपयोग नियन्त्रणका लागि प्रहरीका साथसाथै स्थानीय समुदायको पनि त्यतिकै महत्वपूर्ण भूमिका रहेको उल्लेख गरेका छन् ।
प्रहरी पछिल्लो समयमा कुलतमा लागेका व्यक्तिले मात्र नभएर घरपरिवार र समाजले समेत निकै ठूलो मूल्य चुकाउनुपरेको नायब महानिरीक्षक अमात्यले बताएका छन् । उपन्यासकार न्यौपानेले एउटा किशोरले कुलतबाट छुटकारा पाउन गरेको अठोट, त्यसका लागि उसले चालेको कदम र यसबाट उसको जीवनमा आएको परिवर्तनलाई समेटेर उपन्यास तयार गरिएको जनाएका छन् । हाम्रो समाजमा घट्ने घटनालाई नै समेटेर लेखिएको बताउँदै कुलतमा फस्ताका तमाम कुरा समेटिएको उनले सुनाए ।
नेपालमा हाल एक लाख ५० हजार बढी युवा कुलतमा फसेको गृह मन्त्रालयको तथ्याङ्कमा उल्लेख गरिएको छ । नेपालमा वार्षिक १२ प्रतिशतको गतिमा लागुऔषध प्रयोगकर्ता बढ्दै गएको भन्दै यसलाई नियन्त्रण गर्न गृह मन्त्रालयले हरेक वर्ष सप्ताहव्यापी कार्यक्रमसमेत सञ्चालन गर्दै आएको छ । लागुऔषधका कारण कयौंले अकालमा नै ज्यान गुमाउनुका साथै कतिले त आफ्नो घर गृहस्थीलाई समेत तहसनहस बनाउने गरेका छन् ।
हाल नेपाल प्रहरी, सशस्त्र प्रहरी बलले लागुऔषध दुरुपयोग रोक्नका लागि विशेष योगदान पु¥याएका छन् । सोही अवसरमा लागुऔषध दुरुपयोग तथा अवैध ओसारपसारलाई समेटेर बनाइएको सडक नाटक, नृत्य र ब्याण्डसमेत प्रस्तुत गरिएको थियो । लागुऔषध को न्यूनिकरण गर्नका लागि गरिने यस्ता कार्यक्रमले पनि समाजमा सकरात्मक कुरा प्रवाह गर्ने वत्ताहरुको भनाई थियो ।
