काठमाडौं, असार १६ । ससडोलवासीको समस्याको पहिचान र समाधान निकाल्ने दुई साताभित्र गिरी समिति गठन भएको छ । उक्त समिति गठनले गर्दा काठमाडौँ महानगरपालिकाको फोहोर आजदेखि उठ्न थालेको छ ।
आइतबार साँझ सिसडोलवासीसँग वार्ता गरेर महानगरपालिकाका प्रमुख विद्यासुन्दर शाक्य नेतृत्वको टोलीले समाधान निकालेको हो ।
सिसडोलवासीले विभिन्न माग राखेर एक साता अघिदेखि फोहोर फाल्न अवरोध गरेका थिए । महानगरका प्रवक्ता ईश्वरमान डंगोलले सिसडोलवासीद्वारा काठमाडौँको फोहोर फाल्ने गरिएको ४२ रोपनी जग्गा सरकारले वा महानगरले अधिग्रहण गर्नुपर्ने माग गरिरहेका समेत जानकारी गराए । उनका अनुसार स्थानीयवासीले स्वास्थ्यमा पुगेको प्रतिकूल असरका लागि समाधान खोज्नुपर्ने लगायतका माग महानगरसँग गरेका थिए ।
काठमाडौं महानगरपालिकाले सिसडोलवासीका समस्या समाधानका लागि वडा नम्बर ४ का अध्यक्ष विकास डङ्गोलको अध्यक्षतामा १३ सदस्यीय समिति गठन गरेको उनले बताए । समितिमा महानगरका अरु वडाका अध्यक्ष, वातावरण विभाग प्रमुख र सरोकारवाला स्थानीयवासीसमेत रहेका छन् ।
“समितिलाई १५ दिनभित्रमा प्रतिवेदन प्रस्तुत गर्नेगरी समय सीमा तोकिएको उनले जिकिर गरे । उक्त प्रतिवेदनका आधारमा समाधान निकालिने समेत बताइएको छ ।
स्थानीयवासीले विभिन्न मागहरू राखेर समयसमयमा फोहोर फाल्न अवरुद्ध गर्दै आएका छन् । महानगरले १३ वर्ष पहिले दुई वर्षका लागि भनेर सिसडोलमा फोहोर फाल्न थालेको थियो ।
तेह्र वर्ष बितिसक्दा पनि वैकल्पिक ठाउँ नहुँदा महानगरसँगै उपत्यकाका सबै नगरपालिकाले यहीँ फोहोर फाल्ने गरेका छन् । महानगरपालिकाले केही समय पहिलेबाट यहाँको विकल्पका रूपमा बञ्चरेडाँडामा ‘डम्पिङ साइट’ निर्माण गरिरहेको छ ।
