काठमाडौं, असार २० । धौलागिरि साहित्य प्रतिष्ठान बागलुङले यो वर्षको ‘बम–सरस्वती स्मृति पुरस्कार’ नुवाकोटका साहित्यकार श्रीराम श्रेष्ठलाई प्रदान गर्ने भएको छ । नगद रु १० हजार राशिको सो पुरस्कार यही असार २९ गते २०६ औँ भानु जयन्तीका अवसरमा प्रदान गरिने प्रतिष्ठानले जानकारी गराएको छ ।
नेपाली भाषा, साहित्यको उत्थानमा पु¥याएको योगदानको कदर गर्दै श्रेष्ठलाई पुरस्कृत गर्न लागिएको प्रतिष्ठानका अध्यक्ष काजी रोशनले बताएका छन् । नुवाकोट साहित्य प्रतिष्ठानका संस्थापक अध्यक्षसमेत रहेका श्रेष्ठका ‘जीवन र विज्ञान’ जीवनी, ‘जिजिविषामा बाँच्ने मान्छेहरु’ कविता, हाइकु सङ्ग्रह ‘ट्राफिक जाम’ लगायतका कृति प्रकाशित छन् ।
प्रतिष्ठानले हरेक वर्ष साहित्यमा योगदान पु¥याएका व्यक्तित्वलाई पुरस्कृत गर्दै आएको छ । बागलुङ घर भई हाल बेल्जियममा बस्ने कवि दीपेन्द्र केसीले हजुरबुबा बमबहादुर र हजुरआमा सरस्वती केसीको स्मृतिमा पुरस्कार कोष स्थापना गरेका थिए ।
यसअघि उक्त पुरस्कार पर्वतका साहित्यकार नारायण आचार्य, पाल्पाका पुष्कर ‘अथक’ रेग्मी, चितवनका ऋषिप्रसाद लामिछाने ‘गोर्खे साइँलो’ र बागलुङका प्रकाश समीरले प्राप्त गरेका थिए । पुरस्कार वर्षेनी भानु जयन्तीको अवसर पारेर प्रदान गर्ने गरिन्छ ।
