गौशाला, असोज ३० । शिक्षाको सम्पूर्ण जिम्मेवारी प्रदेश सरकार मातहतमा राख्नुपर्ने प्रदेश नं २ का मुख्यमन्त्री लालबाबु राउतले बताएका छन् उनले बुधबार महोत्तरीमा साइकल वितरण सामारोहमा बोल्दै वर्तमान समयमा सङ्घीय सरकारको शिक्षा नीतिले समग्र शिक्षा क्षेत्र धरासायी हुँदै गएकाले शिक्षा क्षेत्रमा फड्को मार्नका लागि सम्पूर्ण अधिकार प्रदेश सरकारलाई दिनुपर्ने धारणा व्यक्त गरेका छन् । आजको आवश्यकता प्राविधिक शिक्षा रहेकाले मुख्यमन्त्री राउतले प्रदेशलाई नै प्राविधिक शिक्षाको हब बनाउने दिशामा प्रदेश सरकार अग्रसर रहेकोे प्रतिबद्धता जनाउँदै प्रदेश सरकारले ल्याएको ‘बेटी बचाऊ बेटी पढाऊ’ कार्यक्रमले त्यहाँका महिलामा शैक्षिक क्रान्ति ल्याउने दाबी गरेका छन् । उनले हरेक छोरीलाई अभिशाप हैन बरदान÷पुरस्कारको रुपमा लिनुपर्नेमा जोड दिए । उनले थपे, छोरी शिक्षित भए मात्र सामाजिक रुपान्तरण सम्भव हुन्छ ।
‘बेटी बचाऊ, बेटी पढाऊ’ कार्यक्रमअन्तर्गत एकैदिन महोत्तरीका पिपरा गाउँपालिका, जलेश्वर नगरपालिका र एकडारा गाउँपालिका गरी चार विद्यालयमा साइकल वितरण कार्यक्रम सम्पन्न भएकोे थियो । जिल्लाको पिपरा गाउँपालिकाको श्री मावि सहोडबामा ३३, रामनारायण अयोध्या मावि पिपरामा ९५, जलेश्वर नपाको प्रकौली माविमा ६८ र एकडारा माविमा ७६ गरी कक्षा ८ मा अध्यनरत कूल २७२ छात्राहरुलाई साइकल वितरण मुख्यमन्त्री लालबाबु राउतको उपस्थितिमा गरिएको हो ।
पूर्वमन्त्री एवं समाजवादी पार्टीका केन्द्रीय सदस्य हरिनारायण यादव, केन्द्रीय सदस्य रवीन्द्र ठाकुर, प्रदेश सरकारका समाजिक विकास राज्यमन्त्री अभिराम शर्मा, आन्तरिक मामिला तथा कानून राज्यमन्त्री सरोजसिंह कुशवाहा, समाजवादी पार्टी महोत्तरीका अध्यक्ष नागेन्द्र यादवसहितको सहभागिता साइकल वितरण कार्यक्रममा रहेको थियोे ।
