काठमाडौं, कात्तिक ७ । बाकुमा आयोजना हुने असंलग्न आन्दोलन (नाम) का सदस्य राष्ट्रका राष्ट्राध्यक्ष एवं सरकार प्रमुखको १८औँ शिखर सम्मेलनमा नेपालका प्रधानमन्त्री केपी शर्मा ओली अजरबैजानको राजधानीमा सहभागी हुन आज त्यसतर्फ प्रस्थान गरेका छन् । त्रिभुवन अन्तर्रा्ष्ट्रिय विमानस्थलको अतिविशिष्ट कक्षमा राष्ट्रियसभाका अध्यक्ष गणेशप्रसाद तिमिल्सिना, उपप्रधानमन्त्री एवं रक्षामन्त्री ईश्वर पोखरेल, नेपाल कम्युनिष्ट पार्टी (नेकपा) का संसदीय दलका उपनेता सुवास नेम्वाङ, गृहमन्त्री रामबहादुर थापा तथा नेकपाका महासचिव विष्णु पौडेललगायतले उनलाई बिदाइ समेत गरेका थिए ।
उक्त अवसरमा मन्त्रीहरु, सरकारका विशिष्ट श्रेणीका कर्मचारी, सुरक्षा निकायका प्रमुखहरु, यहाँस्थित कूटनीतिक निकायका प्रतिनिधिलगायत विशिष्ट व्यक्तिहरुको उपस्थित समेत रहेको थियो । नेपाली सेनाको एक टुकडीले प्रधानमन्त्री ओलीको सम्मानमा सम्मान गारत अर्पण गरेको थियो ।
आउदो कात्तिक ८ र ९ गते हुन गइरहेको उक्त सम्मेलनमा सहभागी हुने प्रधानमन्त्री नेतृत्वको प्रतिनिधिमण्डलमा परराष्ट्रमन्त्री प्रदीपकुमार ज्ञवाली, प्रधानमन्त्रीका प्रमुख सल्लाहकार विष्णु रिमाल, परराष्ट्र मामिला सल्लाहकार डा राजन भट्टराई, परराष्ट्र मन्त्रालयका सचिव शङ्करदास वैरागी तथा परराष्ट्र मन्त्रालयका वरिष्ठ अधिकारीहरू सहभागी रहेका छन् ।
नेपालले असंलग्न आन्दोलनको संस्थापक राष्ट्रको हैसियतमा स्थापनाकालदेखि नै सबै शिखर सम्मेलनहरूमा सक्रिय सहभागिता देखाउँदै आएको छ । कात्तिक १० गते प्रधानमन्त्री नेतृत्वको प्रतिनिधिमण्डलस्वदेश फर्कने कार्यक्रम रहेको जानकारी पाइएको छ ।
