काठमाडौँ, भदौ १६ । मुलुकको अर्थतन्त्रमा सकारात्मक सूचक देखिन थालेकाले सबै क्षेत्रबाट सहयोगका साथै लगानीका क्षेत्रमा क्रियाशील रहन अर्थमन्त्री ज्ञानेन्द्रबहादुर कार्कीले अनुरोध गरेका छन् ।
उनले अर्थतन्त्र चुनौती र अवसरको दोसाँधमा रहेको र त्यसलाई कसरी सबल बनाउन सकिन्छ भन्ने कुरामा आफुहरु चिन्तनशील भएको बताए । उनका अनुसार उद्योग व्यवसायी एवं सञ्चार क्षेत्रले दिगो अर्थतन्त्रको विकासका लागि सहयोग गर्नु जरुरी छ । नेपाल आर्थिक पत्रकार समाज(सेजनको)को १८ र्औं वार्षिक साधारणसभा तथा निर्वाचन कार्यक्रमलाई सम्बोधन गर्दै उनले मुलुकलाई संवृद्धिको क्षेत्रमा अघि बढाउन सरकार क्रियाशील रहेको र अर्थतन्त्रको दायरासमेत फराकिलो बन्दै गएकाले थप लगानी गर्न सहज हुनेमा जोड दिए ।
लगानी भित्र्याउन र त्यसलाई सही ढंगले परिचालन गर्न जरुरी रहेको भन्दै उनले शहरी र ग्रामीण क्षेत्रमा आर्थिक गतिविधि बढाउन आवश्यक रहेको बताए । त्यसले आर्थिक विकास मात्रै नभइ रोजगारीका अवसर समेत सिर्जना गर्ने र संविधान कार्यान्वयनको प्रक्रिया अगाडि बढेको भन्दै उनले प्रदेश र संघको निर्वाचनपछि मुलुक पूर्ण रुपमा राजनीतिक स्थिरताको चरणमा प्रवेश गर्ने र आर्थिक संवृृद्धिको बाटो समेत प्रशस्त हुने कुरा उल्लेख गरे ।
नेपाल राष्ट्र बैंकका गर्भनर डा. चिरञ्जीवी नेपालले २३ वर्षयता मुलुकको आर्थिक वृद्धिदर ६.९ प्रतिशत रहेको र १३ वर्षपछि मुद्रास्फिति दर समेत चार प्रतिशतको हाराहारीमा रहेकाले आर्थिक क्षेत्र अझै सवल बन्दै गएको तथा लगानीका वातावरण समेत बनेको बताए । बैंक तथा वित्तीय संस्थाको क्षमतामा समेत बढोत्तरी भएको उल्लेख गर्दै उनले ८० प्रतिशत भन्दा बढी भू–भागमा वित्तीय संस्थाको पहुँच पुगेको र बाँकी रहेको २० प्रतिशत क्षेत्रमा समेत तुरुन्त विस्तार गर्ने नीति रहेको जनाए ।
