काठमाडौं, मंसिर १३ । रुस र सर्बियाको भ्रमण सम्पन्न गरेर परराष्ट्रमन्त्री प्रदीपकुमार ज्ञवाली स्वदेश फिर्ता भएका छन् । उनी शुक्रबार बिहान त्रिभुवन अन्तर्राष्ट्रिय विमानस्थल ओर्लिएका हुन् । रुसी महासंघ र गणतन्त्र सर्बियाको औपचारिक भ्रमणका निम्ति शनिबार अपराहृन त्यसतर्फ प्रस्थान गरेका परराष्ट्र मन्त्री ज्ञवालीले ११ गते रुस र १२, १३ गते सर्बियाको भ्रमण गर्ने कार्यतालिका रहेको थियो । तर, मन्त्री ज्ञवाली भ्रमण छोट्याएर शुक्रबार नै स्वदेश फर्किएका छन् ।
परराष्ट्रमन्त्री ज्ञवालीले राजनीतिक सम्बन्ध सुधार, व्यापार प्रबर्द्धन, उर्जामा सहकार्य, भौतिक पूर्वाधार, लगानी भित्र्याउने र राजनीतिक सुधारका विषयमा विचार आदानप्रदान गरेको जानकारी गराएका छन् । रुसी विदेशमन्त्री लाभ्रोभले यूएन मिसनको शान्ति मिसनमा नेपालको भूमिकाको प्रशंसा गरेको पनि परराष्ट्र मन्त्री ज्ञवालीले जनाएका छन् । रुस भ्रमणका क्रममा उनले राष्ट्रपति विद्यादेवी भण्डारीले पठाएको नेपाल भ्रमणको निमन्त्रणा पत्र रुसका राष्ट्रपति भलाद्मीर पुटिन र प्रधानमन्त्री केपी शर्मा ओलीले पठाएको निमन्त्रणा पत्र त्यहाँका प्रधानमन्त्री दिमित्री मेतभेदेवलाई दिएको बताएका छन् ।
उनले नेपाल भ्रमणका लागि अनुकुल वातावरण गर्ने विषयमा पनि रुसी पक्षलाई आफुले आश्वस्त पारेको बताएका छन् । मन्त्री ज्ञवालीले देशभित्र विकसित परिस्थितिलाई ध्यानमा राखेर भ्रमण छोट्याएको बताएका छन् । उनले भ्रमण पर्सिसम्म तय भएको भए पनि आफु आजै स्वदेश फर्कनु परेको बताउँदै भनेका छन्, आज सर्भियाका राष्ट्रपतिलाई भेट्ने कार्यक्रम थियो, देशभित्रको विकसित परिस्थितिले भ्रमण छोट्याएर आइयो । मन्त्री ज्ञवालीले कस्तो परिस्थितिबारे भन्ने विषय भने खुलाउन चाहेनन् ।
परराष्ट्रमन्त्री ज्ञवालीले आगामी चैतमा हुने सगरमाथा संवादका लागि रुसका विदेशमन्त्री सर्जेई लाभ्रोभलाई नेपाल भ्रमणको निम्तो पठाएकोसमेत जानकारी गराएका छन् । उनले नेपाल भ्रमणको निम्तोबारे रुसी पक्षबाट भने कुनै औपचारिक जवाफ नदिएको जानकारी गराएका छन् ।
