विराटनगर, १६ मंसिर । बलात्कार आरोपी सिद्धबाबा भनिने कृष्णबहादुर गिरी उपचारका क्रममा रहेको अस्पतालको आईसीयूबाट नतै पक्राउ गरिएको छ । जिल्ला प्रहरी कार्यालय, सुनसरीको टोलीले सोमबार बिहान ४ बजे विराट नर्सिङहोमबाटै उनलाई पक्राउ गरेको हो ।
डीएसपी विनोद शर्माले पक्राउ गर्दा अनुयायीले अवरोध गर्नसक्ने भएकाले बिहानै आईसीयूबाटै नियन्त्रणमा लिएर सुनसरी लगिएको जानकारी गराइएको छ । उनका समर्थकले पक्राउ गर्न बाधा पुर्याउने देखिए पछि राती नै उनलाई आईसीयूबाटै पक्राउ गरिएको जनाइएको छ । बलात्कार आरोपी सिद्धबाबालाई प्रहरीले आइतबार नै नियन्त्रणमा लिने प्रयास गरे पनि प्रहरीको प्रयास असफल भएको थियो ।
विराट नर्सिङ होमले गिरीलाई हृदयघात भएको भन्दै आईसीयूमा राखेको जनाए पछि सुनसरीबाट उनलाई लिन पुगेको प्रहरी टोली रित्तै फर्किएको थियो । विराट अस्पतालका चिकित्सक ज्ञानेन्द्र गिरीले उनलाई ‘माइनर हर्ट अट्याक’ भएको बताएका थियो । हेलचेक्रयाइँ गर्दा थप जटिलता आउने सक्ने भन्दै अस्पतालले उनलाई आईसीयूमा राखेर उपचार गरिएको र अहिले भने केही सुधार आएको जनाएको थियो ।
पक्राउ परेका उनलाई एम्बुलेन्समा हालेर अहिले जिल्ला प्रहरी कार्यालय, सुनसरी र्पुयाइएको प्रहरीले जनाएको छ । सिद्धबाबालाई उनकै अनुयायीले आफुलाई बलात्कार गरेको आरोप लगाएकी छन् । गत कात्तिक ४ गते बलात्कार गरेको भन्दै महिलाले उजुरी गरे पछि प्रहरीले यसबारे अनुसन्धान सुरु गरेको थियो । अनुसन्धानका लागि थप सहज होस् भनी उनलाई पक्राउ गरिएको प्रहरीको भनाई छ ।
