काठमाडौं, मंसिर २९ । जिल्ला बालक्लब सञ्जाल काभ्रेपलाञ्चोकको पाँचौँ जिल्ला बालभेलाले गान्धीव गौतमको अध्यक्षतामा १३ सदस्यीय नयाँ कार्यसमिति चयन गरेको छ । कार्यसमितिका उपाध्यक्षमा सुवोध धिमाल, सचिव भवानी दाहाल, सहसचिव सविना विक, कोषाध्यक्षमा सुभद्रा तिमल्सिना रहेका छन् । शनिबार सम्पन्न भएको उक्त भेलाले सदस्यमा सुजन सापकोटा, काजोल लुकलुङे, सञ्जु उप्रेती, सुदिना हुँमागाईं, मनोज रानामगर, विनिता चिमौरिया, रेणु थिङ र मालती कुँवर रहेका छन् ।
सञ्चार तथा सूचना प्रविधिमन्त्री गोकुलप्रसाद बाँस्कोटाले भेलाको उद्घाटन गरेका थिए । ‘सुनिश्चित बालअधिकार, समृद्ध नेपालको आधार’ भन्ने नाराका साथ बालअधिकार महासन्धि, संविधान र बालबालिकासम्बन्धी ऐन, कानून र नीति–नियमको सम्मान गर्दै राज्यका सबै तहलाई बालमैत्री बनाउनुपर्नेलगायतका माग गर्दै घोषणापत्र जारी गरिएको थियो ।
बालबालिकामाथि भइरहेको सबैखाले यातना, हिंसा र दुव्र्यवहारको अन्त्य गरिनुपर्ने, सबै बालबालिकाका लागि शिक्षा र स्वास्थ्यमा सर्वसुलभ पहुँचको व्यवस्था गरी कार्यान्वयन गरिनुपर्ने, जिल्लालाई बालश्रम र बालविवाहमुक्त बनाइनुपर्ने, सबै क्षेत्रमा बालमैत्री, बालसुलभ तरिकाले बालबालिकाको पहुँचयोग्य न्यायको व्यवस्था गरिनुपर्ने, बाबुआमा गुमाएका अभिभावकविहीन बालबालिकालाई सरकारले अभिभावकत्व ग्रहण गरी संरक्षक बन्नुपर्ने, सबैखाले अपाङ्गता भएका बालबालिकाको उचित संरक्षकत्व सरकारले ग्रहण गरिनुपर्ने घोषणापत्रमा उल्लेख गरिएको छ ।
