राहुल गुप्ता
वीरगंज, फागुन १ । पर्साका प्रमुख जिल्ला अधिकारी बिष्णु कुमार कार्की र पर्साका संचारकर्मी बिच भेटघाट, परिचय तथा छलफल कार्यक्रम सम्पन्न भएको छ । जिल्ला प्रशासन कार्यालय पर्साको सभाहलमा भएको कार्यक्रममा संचारकर्मीहरुले पर्सा जिल्लामा देखिएका समस्या, तस्करी, भ्रष्टाचार, ठेकापट्टा लगायतको बिषयमा आफनो धारणा राखेका थिए ।
जवाफमा प्रजिअ कार्कीले पर्सामा देखिएको समस्याबारे आफु चिन्तित रहेको बताउदै शान्ति सुरक्षामा कुनै किसिमको कमी नआउने, भ्रष्टाचार, कालो बजारी, तस्करी नियन्त्रण र प्रशासनिक क्षेत्रमा देखिएको समस्याहरुलाई चाँडै समाधान गर्न आफुले प्रभाबकारी भुमिका निर्वाह गर्ने जानकारी गराएका थिए । लामो समययता स्थगित गरिएका विकाश निर्माणका काममा पनि बिशेष पहल गर्न सबैको साथ सहयो आवश्यक रहेको औंल्याएका थिए ।
सोही क्रममा पक्रकारहरुले दोहोरो नागरिकता लिएका व्यक्तिहरु पक्राउ परेको समयसम्म उनीहरुको समाचार मीडियामा आउने र पक्राउ परेपछि उनीहरुमाथि के–कस्तो कारवाही भएको नभएको भन्ने समाचार चाँहि कुनै सञ्चारमाध्यममा स्थान नपाएकाृ र कुनै सञ्चारमाध्यमलाई यस्ता गम्भिर कुरामा जानकारी नगराउनुको कारणबारे प्रजिअ समक्ष पत्रकारहरुले प्रश्न राखेका थिए ।
त्यसैगरी श्रीसिया जग्गा विवादमा फसेका किसानहरुको समस्या पनि चाडै समाधान गर्न पत्रकारहरुले प्रजिअलाई ध्यानाकर्षण गराएका थिए । सो अवसरमा सहायक प्रमुख जिल्ला अधिकारी ललित कुमार बस्नेत, नेपाल पत्रकार महासंघ प्रदेश २ का अध्यक्ष दीपेन्द्र चौहान, उपाध्यक्ष केसी लामिछाने, पर्सा शाखा अध्यक्ष श्याम बन्जारा लगायत पत्रकारहरुको बाक्लो सहभागिता रहेको थियो ।
