ललितपुर, भदौ २५ । काँग्रेसका पूर्व केन्द्रीय सदस्य स्व प्रतापराम लोहारप्रति प्रधानमन्त्री एवं नेपाली काँग्रेसका सभापति शेरबहादुर देउवाले श्रद्धाञ्जलि व्यक्त गरेका छन् ।
प्रधानमन्त्री देउवाले नेपाली काँग्रेसको केन्द्रीय कार्यालयको प्राङ्गणमा राखिएको लोहारको पार्थिव शरीरमा पार्टीको झण्डा ओढाएर श्रद्धाञ्जलि अर्पण गरेका हुन् । दलित आन्दोलनका अथक योद्धा एवं समाजसेवी लोहारको निधनले आफूलाई अत्यन्त मर्माहत र दुःखी बनाएको तथा काँग्रेसको संगठन एवं समग्र दलित आन्दोलनमा अपूरणीय क्षति पुगेको प्र.म. देउवाले विज्ञप्ति मार्फत बताएका छन् ।
काँग्रेसको संगठन, लोकतन्त्रको सुदृढीकरण र दलित उत्थानमा लोहारले पुर्याएको सक्रिय योगदान पार्टीको इतिहासमा सदा स्मरणीय रहने बताउँदै शोकसन्तप्त परिवारमा पार्टी र आफ्नातर्पmबाट समवेदना प्रकट गरेको विज्ञप्तिमा उल्लेख गरिएको छ ।
लोहारप्रति काँग्रेसका वरिष्ठ नेता रामचन्द्र पौडेल, नेता तथा उपप्रधानमन्त्री गोपालमान श्रेष्ठ, नेता अर्जुननरसिंह केसी, जीवन परियारलगायतले श्रद्धाञ्जलि व्यक्त गरेका थिए ।
लोहारको ७४ वर्षका उमेरमा यही भदौ २३ गते उपचारका क्रममा सुमेरु अस्पताल ललितपुरमा निधन भएको थियो । लोहारका एक श्रीमती, एक छोरा र चार छोरी छन्। लोहारको दाहसंस्कार आजै पशुपति आर्यघाटमा गरिने कार्यक्रम छ ।
