समृद्ध नेपाल बनाउने वि.पी. कोइरालाको सपना र समृद्धिको अभियानमा सबै लाग्न सकेमा समृद्ध नेपाल निर्माण हुन सक्ने नेपाली कांग्रेसका महामन्त्री शशांक कोइरालाले बताएका छन् ।
नेपाली कांग्रेस ललितपुर क्षेत्र नं. ३ क्षेत्रिय समितिले लगनखेलमा आज आयोजना गरेको महामानव वि.पी कोइरालाको १०४ औं जन्म जयन्ति, बधाई तथा सम्मान कार्यक्रममा बोल्दै नेता कोइरालाले वि.पी. सँग पर्याप्त सपना भएको तर समय नभएको र अहिलेका नेता तथा कार्यकर्तामा समय भएको तर सपना नभएको बताएका थिए । उनले वि.पी.ले नीति नियमलाई कार्यकर्ताको सुझाव सल्लाह अनुसार अगाडि लाने गरेको बताउँदै अहिलेका नेताले आफ्नो विचारलाई लाद्दै कार्यकर्ताको सोच विचारको वास्ता नगरेको आरोप लगाए । नाता सम्बन्ध भन्दा माथि उठि वि.पी ले जहिले पनि निर्णय गर्ने गरेको बताउँदै अहिले हावी भएको नातावाद कृपावादको राजनीति अन्त्य हुनुपर्ने बताए ।
सोही कार्यक्रममा बोल्दै नेपाल सरकारका अर्थ राज्यमन्त्री उदय शम्शेर राणाले वि.पी कोइरालाको लोकतान्त्रिक समाजवादको नीतिले अहिलेसम्म नेपाली कांग्रेस टिकेको बताउँदै वि.पी ले देखाएको बाटोमा सबैले हिड्नुपर्ने बताए । उनले आगामी प्रदेश र केन्द्रको चुनावमा पार्टीले टिकट वितरण गर्दा राम्रो मान्छेलाई टिकट दिई हाम्रालाई च्याप्ने प्रवृतिको अन्त्य गरिनुपर्ने बताए ।
उक्त कार्यक्रममा बोल्दै नेपाली कांग्रेस ललितपुरका पार्टी सभापति तथा माननीय सांसद मदन बहादुर अमात्यले साँघुरो सोच र मानसिकतालाई परिवर्तन गर्दै वि.पी को नीति र वि.पी ले देखाएको बाटोमा हिँड्न सबैलाई आग्रह गरे । राजनीति कुनै दाउ पेच, छक्कापञ्जा गर्ने खेल नभएको, उत्कृष्ट नीति भएको प्रष्ट पारे । प्रजातन्त्रलाई आत्मसाथ नगरेको व्यक्ति राजनीतिज्ञ नहुने उल्लेख गर्दै चरित्र र राजनीति गर्ने व्यक्तिको संस्कार राम्रो हुनुपर्ने बताए । प्रजातन्त्रको धरोधर कांग्रेसले पछिल्लो समयमा प्रजातन्त्रलाई अनुसरण नगरेको र प्रजातन्त्रलाई आघात हुने काम गर्ने तथा कांग्रेसको खोल ओढ्ने व्यक्ति कुनै पनि हालतमा कांग्रेस नहुने जिकिर गरे । धेरैले बलिदान दिएर प्रजातन्त्र ल्याएको तथा प्रजातन्त्रको रक्षक नै कांग्रेस भएको उल्लेख गर्दै पार्टी तथा कार्यकर्ताले प्रजातन्त्रको अहितमा काम नगर्न आग्रह गरे । नेतृत्व तहबाट भाग बन्डाको राजनीति गरेको बताउँदै उनले पार्टीलाई बलिदान दिएको योग्य, सक्षम र सबल व्यक्ति सधैं ओझेलमा पर्ने गरेको आक्रोश पोख्दै प्रदेश र केन्द्रीय चुनावमा नेतृत्व तहले भागबन्डाको राजनीति गरे आफुलाई मान्य नहुने र त्यसको विरोधमा लाग्ने बताए । कांग्रेस कार्यकर्ताको कारणले मात्र बाँकी रहेको उल्लेख गर्दै कार्यकर्ताको उत्साहलाई मार्दै आफ्नो स्वार्थमा नलाग्न नेतृत्व तहलाई अनुरोध गरे । टिकट वितरण जनताको आकांक्षा अनुसार गरिनुपर्ने र सबै कार्यकर्ताको भावनामा ठेस पुर्याउने काम नेतृत्व तहबाट नगर्न सुझाव दिए ।
ललितपुर महानगनपालिकाका मेयर चिरीबाबु महर्जनले सोही कार्यक्रमलाई सम्बोधन गर्दै पार्टी एक ढिक्का भएर अगाडि बढे कुनै शक्तिले हराउन नसक्ने बताए । रिस रागलाई त्यागी पार्टी र संगठनको हितका लागि वि.पी. विचारलाई आत्मसाथ गर्दै अगाडि बढ्न सबैलाई आग्रह गरे ।
उक्त कार्यक्रमा माननीय सांसद चन्द्रबहादुर महर्जन, पूर्व सांसद रामकृष्ण चित्रकार, ललितपुर महानगर पालिका उपमेयर गीता सत्याल, गोदावरी नगरपालिका उपमेयर मुना अधिकारी तथा पार्टीका पदाधिकारी, सदस्य, महासमिति सदस्य लगायतको उपस्थिति रहेको थियो ।
उक्त कार्यक्रमको क्षेत्र नं ३ का क्षेत्रिय सभापति, गोदावरी नगरपालिका प्रमूख गजेन्द्र महर्जनको सभापतित्वमा सम्पन्न भएको थियो । कार्यक्रमलाई दुई चरणमा विभाजन गरिएको थियो । पहिलो चरणमा १०४ औं वि.पी जन्म जयन्ति, बधाई तथा सम्मान र दोश्रो चरणमा कार्यकर्ता भेला तथा प्रशिक्षण रहेको थियो । कार्यक्रमको प्रशिक्षकको रुपमा नेपाल टेलिभिजनका प्रमूख महेश दाहाल रहेका थिए ।
