काठमाडौं/पुस ९ नेपाल कम्युनिष्ट पार्टी (नेकपा) प्रचण्ड–माधव समूहका विद्यार्थी नेता, कार्यकर्ताहरुले संसद विघटनको विरोधमा काठमाडौंमा राँके जुलुसमा निकालेका छन् ।
बानेश्वरबाट बिहीबार साँझ विजुली बजार हुँदै माइतीघरसम्म निकालिएको जुलुसलाई प्रहरीले हस्तक्षेप गरी तितरवितर पार्न खोजेपछि ढुंगा हानाहान भएको थियो । प्रहरीले राँको खोस्न थालेपछि प्रदर्शनकारी र प्रहरीबीच झडप भएको जुलुसमा सहभागी एक नेता बताए । प्रहरीले जुलुसलाई तितरवितर पार्न खोजेपछि प्रदर्शनकारीले ढुंगा हानेका थिए । त्यसक्रममा प्रहरीले लाठीचार्जसमेत गरेको छ ।
काठमाडौं प्रहरी प्रमुख एसएसपी अशोक सिंहले रातको समस्या राँके जुलुस निकाल्दा अन्यत्र सल्किएर आगलागी हुनसक्ने भएकाले नियन्त्रणमा लिइएको बताए । जुलुस निकाल्न नदिने भन्ने नीति त होइन तर, रातको समयमा अन्य क्षति नहोस् भनेर नियन्त्रणमा लिने प्रयास गरिएको हो’ प्रहरी प्रमुख एसएसपी सिंहले बताए ।
