काठमाडौं । १४ पुस, नेपाल आएको चिनियाँ टोलीले पूर्व प्रधानमन्त्री एवम् नेपाली कांग्रेस सभापति शेरबहादुर देउवालाई मंगलबार भेटेको छ । सत्तारुढ नेपाल कम्युनिस्ट पार्टी (नेकपा) मा फुट आएसँगै चिनियाँ कम्युनिस्ट पार्टीको विदेश विभागका उपपमन्त्री गुओ यैचो नेतृत्वको टोली मंगलबार विहानै बूढानीलकण्ठस्थित देउवा निवास पुगेको थियो । भेटमा चिनियाँ टोलीले राष्ट्रपति सी चिनफिङको शुभकामना सन्देश सुनाएका थिए भने देउवाले चिनियाँ कम्युनिस्ट पार्टी स्थापनाको १०० वर्ष पूरा भएकोमा बधाई तथा शुभकामना दिएका छन् ।
कांग्रेसका परराष्ट्र सल्लाहकार दिनेश भट्टराईका अनुसार चिनियाँ टोलीले नेपालका सबै पार्टीसँग मितेरीपूर्ण सम्बन्ध राख्ने बताएको थियो । सम्वादका क्रममा उनीहरुले कांग्रेस संस्थापक बीपी कोइरालालाई पटकपटक स्मरण गरेका थिए ।
सत्तारुढ नेकपामा फुट आएलगतै आएको चिनियाँ टोलीले देउवालाई भेट्नुका साथै सीमा विवादबारे सांकेतिक रुपमा बोलेका छन् । भट्टराईका अनुसार चिनियाँ टोलीले कांग्रेस र चिनियाँ कम्युनिस्ट पार्टीको सम्बन्धबारे चर्चा गर्ने क्रममा नेपाल–चीन सीमासम्बन्धी प्रोटोकलको आधारशीला कांग्रेस नेता एवं तत्कालीन प्रधानमन्त्री बीपीकै पालामा तयार भएको
बताएका थिए । भट्टराईका अनुसार चिनियाँ टोलीले सन् २०२१ मा चिनियाँ कम्युनिस्ट पार्टी स्थापनाको अवसरमा हुने कार्यक्रमका लागि देउवालाई निम्तोसमेत दिएको छ ।
