-टुकमाया पन्त
जाजरकोट । नेपालीहरुको महान पर्व विजया दशमी, शुभदिपावली, छठ जस्ता चाडबाड नजिकिँदै गर्दा जाजरकोटका दुर्गम गाउँमा खाद्यान्न अभाव शुरु भएको छ ।
गाउँमा नयाँ बाली नपाकेको तथा पुरानो अन्न सकिएकाले खाद्य अभाव भएको हो । जिल्लाको बारेकोट गाउँपालिका, कुशेगाउँ पालिका, जुनीचाँदे गाउँपालिका, छेडागाड नगरपालिका, शिवालय गाउँपालिका तथा त्रिबेणी नलगाड नगरपालिकाका बासिन्दाले तत्कालै चामल आपुर्तीको माग गरेका छन् । बारेकोटको घाट खाद्य डिपोमा चामल नहुँदा स्थानीय बासिन्दाले दशैमा भात खान नपाउने भएका छन् । गाउमा खाद्य अभाव भएपछि डिपोमा चामल लिन आउने स्थानीय रित्तो हात घर फर्कने गरेका बारेकोट गाउँपालिका २ का मिमबहादुर सिंहले बताएका छन् ।
गत असार देखि डिपोले चामल उपलब्ध नगराएको सिंहले बताए । खाद्य अभावबाट पिडित स्थानीय चामलका डिपोमा बारम्बार धाउने गरे पनि रित्तो हात फर्कने क्रम बढ्न थालेको छ । गाउँघरमा पुरानो अन्न सकिएको, नयाँ बाली नपाकेको र डिपोमा चामल उपलब्ध नहुँदा खाद्यन्नको चरम अभाव भएको हो । नयाँ बाली पाक्न डेड् महिना बढी समय लाग्ने भएकाले त्यतिबेलासम्म भोकमरी फैलन सक्ने विरेन्द्र ऐश्वर्य मावि लिम्साका प्रधानाध्यापक गोरखबहादुर सिंहले बताएका छन् । स्थानीयले दशैंको मुखमा भात खान नपाउने संकेत जाजरकोटमा देखिएको छ ।
खाद्य संस्थानले बारेकोट गाउपालिकाका २० हजार बासिन्दाका लागि तत्काल १ हजार क्विन्टल चामलको आपुर्ती गनु पर्ने देखिएको सिंहले बताए । बारेकोट क्षेत्रमा धान उत्पादन नहुने हुँदा बर्षेनी चामलको अभाव हुने गरेको छ । डिपोमा पुरानो स्टक सकिएको र नयाँ ढुवानीका लागि व्यबसायीसँग सम्झौता भई नसकेकोले बारेकोटमा चामल अभाव भएको निमित्त शाखा प्रमुख राम प्रसाद पौडेलले बताएका छन् । गत आर्थिक बर्ष घाट डिपोमा १ हजार १६ क्विन्टल चामल ढुवानी भएको थियो । प्राय खाद्य अभाव हुने बारेकोटमा चामल कोटा कमै भएको छ । ती स्थानमा खाद्य अभाव भएपछि डिपोमा चामल आपुर्तीको माग बढेको हो । खाद्य अभावले स्थानीय बजारमा मोटो चामललाई १०० रुपैयाँ प्रति किलोमा किन्नु पर्ने वाध्यता भएको बारेकोट गाउपालिका ८ का रुद्र खत्रीले बताएका छन् ।
यतिबेला संस्थानको सदरमुकाम खलंगा स्थित गोदाममा ५ सय क्विन्टल चामल मौजदात छ । गाउका घाट र चौखा डिपोमा चामल नहुँदा दुर्गममा खाद्य अभाव भएको हो । संस्थानले जिल्लामा कम चामल आपुर्ती गर्दा चार्डपर्वको मुखमा हरेक बर्ष खाद्य अभाव हुने गरेको हो । खाद्य अभावले भौतारिंएका स्थानीय बजारको महङ्गो चामल किनेर गुजारा चलाउन वाध्य छन् ।
