काठमाडौं । माथिल्लो तामाकोसी र सेञ्चुरी बैंकको सेयर मूल्यामा सकारात्मक सर्किट देखिएको छ । लगातार बजार बजारमा बजार खुल्ने वित्तिकै यी दुई कम्पनीको सेयरमा ह्वात्तै वृद्धि भएको हो ।
निर्माण सकेर सफल परीक्षण गरेको माथिल्लो तामाकोसी जलविद्युत् आयोजनाबाट उत्पादित भएको विद्युत् राष्ट्रिय प्रसारण लाइनमा जडान हुने भएपछि तामाकोसी कम्पनीको सेयर मूल्य बढेको हो । गत बिहीबार दिउँसोदेखि नै कम्पनीको सेयर मूल्य लगातार बढेको थियो । जुन आइतबार पनि कायमै रह्यो ।
माथिल्लो तामाकोसीले आगामी साता राष्ट्रिय प्रसारण लाइनमा विद्युत् जडान गर्दैछ । कुल ४५६ मेगावाट विद्युत् उत्पादन क्षमता भएको आयोजनाले शुरुमा ६ वटा युनिटमध्ये २ वटा युनिटबाट उत्पादित १५२ मेगावाट प्रसारण लाइनमा जोड्ने छ । आयोजनाले भदौ र असोज महिनासम्ममा पूर्ण क्षमतामा विद्युत् उत्पादन गर्ने लक्ष्य लिएको छ ।
कम्पनीको ४३ हजार ४६७ कित्ता सेयर ३ करोड ५४ लाख ८३ हजार ३२५ रुपैयाँमा कारोबार भएको छ । सेञ्चुरी कमर्सियल बैंकको सेयरमा पनि सकारात्मक सर्किट लागेको छ । आइतबार कम्पनीको कुल १२ लाख ९३ हजार २२२ कित्ता सेयर ३७ करोड ८३ लाख ७५ हजार ५०२ रुपैयाँमा कारोबार भएको छ ।
सेञ्चुरी बैंक मर्जरमा जाने हल्लासँगै कम्पनीको सेयर मूल्यमा उछाल आएको हुन सक्ने जानकारहरुको भनाइ छ । पछिल्लो समय नबिल बैंकसँगको मर्जरको हल्लाले बजार तताएको जानकारहरुको टिप्पणी छ । केही समययता नबिल बैंकसँगको मर्जरको हल्ला एनसीसी, सिद्धार्थ, एनबीबीलगाायतका बैंकको सेयर मूल्य पनि बढेको थियो ।
